Aqtöbe oblysyndaǧy su qūbyry jelılerınıŋ qūrylysyna qaitarylǧan aktivter qarajaty esebınen 5 mlrd teŋge bölındı. Būl turaly bügın, 5 tamyzda Ükımettıŋ baspasöz qyzmetı jazdy, dep habarlaidy «Adyrna» tılşısı.
«Aqtöbe oblysyndaǧy Sarybūlaq jer asty sulary ken ornynan toptyq su qūbyryn saluǧa Arnauly memlekettık qordan 5 mlrd teŋge bölındı. Joba tūrǧyn üi qūrylysy qarqyndy jürgızılıp, kommunaldyq jelılerge tüsetın jükteme artyp kele jatqan Aqtöbe qalasynyŋ Batys-1, Batys-2 jäne Batys-3 şaǧyn audandaryn tūraqty auyz sumen qamtamasyz etuge baǧyttalǧan»,– delıngen habarlamada.
Sarybūlaq ken orny oblys ortalyǧynan 56 şaqyrym jerde ornalasqan. Joba aiasynda mūnda 20 artezian ūŋǧymasy būrǧylanyp, qajettı infraqūrylymmen jabdyqtalmaq. Sondai-aq toptyq su qūbyry salynyp, jelıler tūrǧyn üi alaptaryna deiın jetkızıledı. Qūrylys jūmystary biyl bastalady.
Nysan paidalanuǧa berılgennen keiın Aqtöbe qalasynyŋ tūrǧyndary, sondai-aq Alǧa jäne Mūǧaljar audandaryndaǧy eldı mekender täulıgıne qosymşa 70 myŋ tekşe metrge deiın auyz sumen qamtamasyz etıledı. Onyŋ ışınde oblys ortalyǧynyŋ qarqyndy damyp jatqan audandarynyŋ ösıp kele jatqan sūranysyn öteu üşın täulıgıne 25 myŋ tekşe metr su baǧyttalady. Sarybūlaq ken ornynyŋ barlanǧan qory öŋırdı aldaǧy 30 jyl boiy tūraqty auyz sumen qamtamasyz etuge jetkılıktı.
Aita keteiık, 2024–2026 jyldar aralyǧynda Arnauly memlekettık qor qarajaty esebınen Ükımet jalpy qūny 610 mlrd teŋgenı qūraityn 500-den astam äleumettık jobany qarjylandyrudy maqūldady. Olardyŋ basym bölıgı bügınde paidalanuǧa berıldı. Onyŋ ışınde jalpy qūny 226,5 mlrd teŋgenı qūraityn 267 joba su infraqūrylymyn damytuǧa baǧyttalǧan.
