Aqtöbede būryn jeke avtotūraqtar ornalasqan aumaqtyŋ ornyna jaŋa demalys orny paida boldy.
Bökenbai batyr köşesınıŋ boiynda «Sälem» dep atalatyn alleia aşyldy. Onyŋ basty erekşelıgı — jer şary pışınındegı jaryq installiasiiasy. Onda «sälem» sözı älemnıŋ 30 tılınde jazylǧan.
Būǧan deiın būl aumaqta eskı kölıkter men türlı tehnikalar saqtalǧan ekı jekemenşık avtotūraq bolǧan. Jalpy aumaǧy 7 671 şarşy metrdı qūraityn ekı jer uchaskesı Aqtöbe qalasy äkımdıgınıŋ qaulysy negızınde memleket mūqtajy üşın mäjbürlep alynyp, qalanyŋ jer qoryna qaitarylǧan.
Biyl demeuşınıŋ qoldauymen aumaq tolyqtai abattandyryldy. Būryn qarausyz qalǧan alaŋnyŋ ornyna jaiau jürgınşıler joly, oryndyqtar, qoqys jäşıkterı men şaǧyn säulettık nysandar ornatylǧan zamanaui alleia salyndy. Sondai-aq jaryqtandyru jüiesı jürgızılıp, balalar oiyn alaŋy men sportpen şūǧyldanuǧa arnalǧan vorkaut alaŋy jabdyqtaldy. Jaqyn maŋdaǧy üilerdıŋ tūrǧyndarynyŋ ötınışı eskerılıp, kölık qoiuǧa da oryn qarastyrylǧan.
Kögaldandyru jūmystaryna da köŋıl bölındı. Aumaqta suaru jüiesı tartylyp, 4 qaraşa künı «Taza Qazaqstan» aksiiasy aiasynda 60 tüp aǧaş otyrǧyzyldy. Olardyŋ qatarynda şyrşa, jöke, qaiyŋ, şaǧan jäne terek bar.
Tūrǧyndardyŋ aituynşa, būǧan deiın būl jer qoqysqa tolyp, balalardyŋ oinauyna qolaisyz bolǧan.
«Būryn balalardyŋ oinaityn jerı joq edı. Būl alaŋ bos jatty, qoqysqa tolyp tūratyn. Endı balalar üşın osyndai ädemı oryn jasaldy. Mūnda taza ärı qauıpsız, oiyn alaŋy da bar. Qazır aǧaştar otyrǧyzylyp jatyr. Uaqyt öte kele naǧyz jasyl baqqa ainalatyn türı bar», — dedı qala tūrǧyny Mūharram Baizaqov.
Alleianyŋ aşylu saltanatynda Aqtöbe qalasynyŋ äkımı Azamat Beket būl jer telımderınıŋ qaladaǧy halyq tyǧyz ornalasqan aumaqta, sondai-aq Äliia Moldaǧūlova atyndaǧy halyqaralyq äuejaiǧa aparatyn negızgı köşelerdıŋ boiynda ornalasqanyn atap öttı.
«Osyǧan bailanysty būl aumaqta tūrǧyndardyŋ demaluyna arnalǧan qoǧamdyq keŋıstık qalyptastyryp, qalanyŋ säulettık kelbetın jaqsartu turaly şeşım qabyldanǧan bolatyn. Biyl demeuşı tartylyp, aumaqty abattandyru jūmystary jürgızıldı.
Qazırgı taŋda mūnda tūrǧyndardyŋ seruendeuıne arnalǧan jaiau jürgınşıler joly salynyp, bruschatka töseldı. Oryndyqtar, qoqys jäşıkterı men şaǧyn säulettık nysandar ornatyldy. Sondai-aq saiabaq şamdary qoiylyp, būǧan deiın köktem-küz mezgılderınde batpaqqa ainalyp, qaraŋǧy bolyp tūratyn aumaq jaryqtandyryldy.
Būdan bölek, suaru jüiesı tartylyp, kögaldandyru jūmystary jürgızıldı. Balalar oiyn alaŋy men sportpen şūǧyldanuǧa arnalǧan vorkaut alaŋy ornatyldy.
Qala boiynşa jer telımderın memleket menşıgıne qaitaru jūmystary jalǧasyp jatyr. Biyldyŋ özınde 125 jer uchaskesı qaitaryldy. Olardyŋ jalpy aumaǧy 90 gektardy qūraidy. Būl — ärtürlı maqsattaǧy jerler. Onyŋ ışınde bas josparǧa säikes kelmeitın nemese igerılmegen uchaskeler de bar. Būl baǧyttaǧy jūmystar jalǧasyn tabady», — dedı qala äkımı Azamat Beket.
Osylaişa, būryn qarausyz qalǧan aumaq tūrǧyndardyŋ demalysy men seruendeuıne arnalǧan jaŋa qoǧamdyq keŋıstıkke ainaldy. Al 30 tılde jazylǧan «Sälem» sözı bar jaryq installiasiiasy alleianyŋ erekşe nyşany bolmaq.
