Aqtóbede oblystyq ákimdik qyzmetkerin 35 jerden pyshaqtap óltirgen qaskóıdiń jazasy aýyrlady. Bul týraly KTK telearnasy jarııalady, dep habarlaıdy “Adyrna” ulttyq portaly.
Buǵan deıin ol 11 jylǵa sottalǵan bolatyn. Alaıda isti qaıta qaraǵan apellıaııalyq alqa burynǵy jazaǵa taǵy tórt jyl qosyp, sottalýshyny 15 jylǵa bas bostandyǵynan aıyrdy.
Osy kesip tesilgen dene jaraqattary qosarlana densaýlyqqa aýyr zııan keltirgen. Ishke jáne syrtqa qan kóp ketýmimen asqynǵan. Sol sebepti ómirine qaýip tóngen jáne ólimge alyp kelgen, – delingen sot habarlamasynda.
Marqumnyń týystary kesilgen jazamen áý basta-aq kelispegen. Óıtkeni birinshi sot qylmystyq istegi asa qatygezdikpen degen bapty alyp tastap, tek adam óltirgeni úshin sottapty. Biraq qaskóıdiń marqumdy pyshaqtaǵan soń, es tússiz qansyrap jatqanda qosymsha baýyzdaǵany anyqtaldy. Kózine qan quıylǵan kúdikti óli deneni júksalǵyshqa tyǵyp, eki kún júrgeni de jan túrshiktiredi. Saraptama onyń psıhıkalyq aýytqýdan ada ekenin de rastaǵan.
Eske salsaq, bul qandy qylmys osydan 4 aı buryn boldy. Qylmysker men jalǵyzbasty ana ǵalamtorda tanysqan. Jigit ózin boıdaq jáne áıelden 6 jas úlken ekenin aıtady. Alaıda aqyrǵy kezdesýinde marqum kóńildesiniń otbasyly ekenin uıaly telefonyndaǵy sýretterden bilip qalǵan. Sodan týǵan janjaldyń arty eki balany anasyz qaldyrdy. Oblystyq ákimdikte jumys isteıtin áıeldiń kóńildesi kóliginiń sýyrmasynda jatqan pyshaqty alyp, 35 jerinen suqqylaǵan.
