اقتوبەدە بۇرىن جەكە اۆتوتۇراقتار ورنالاسقان اۋماقتىڭ ورنىنا جاڭا دەمالىس ورنى پايدا بولدى.
بوكەنباي باتىر كوشەسىنىڭ بويىندا «سالەم» دەپ اتالاتىن اللەيا اشىلدى. ونىڭ باستى ەرەكشەلىگى — جەر شارى پىشىنىندەگى جارىق ينستاللياتسياسى. وندا «سالەم» ءسوزى الەمنىڭ 30 تىلىندە جازىلعان.
بۇعان دەيىن بۇل اۋماقتا ەسكى كولىكتەر مەن ءتۇرلى تەحنيكالار ساقتالعان ەكى جەكەمەنشىك اۆتوتۇراق بولعان. جالپى اۋماعى 7 671 شارشى مەتردى قۇرايتىن ەكى جەر ۋچاسكەسى اقتوبە قالاسى اكىمدىگىنىڭ قاۋلىسى نەگىزىندە مەملەكەت مۇقتاجى ءۇشىن ماجبۇرلەپ الىنىپ، قالانىڭ جەر قورىنا قايتارىلعان.
بيىل دەمەۋشىنىڭ قولداۋىمەن اۋماق تولىقتاي اباتتاندىرىلدى. بۇرىن قاراۋسىز قالعان الاڭنىڭ ورنىنا جاياۋ جۇرگىنشىلەر جولى، ورىندىقتار، قوقىس جاشىكتەرى مەن شاعىن ساۋلەتتىك نىساندار ورناتىلعان زاماناۋي اللەيا سالىندى. سونداي-اق جارىقتاندىرۋ جۇيەسى جۇرگىزىلىپ، بالالار ويىن الاڭى مەن سپورتپەن شۇعىلدانۋعا ارنالعان ۆوركاۋت الاڭى جابدىقتالدى. جاقىن ماڭداعى ۇيلەردىڭ تۇرعىندارىنىڭ ءوتىنىشى ەسكەرىلىپ، كولىك قويۋعا دا ورىن قاراستىرىلعان.
كوگالداندىرۋ جۇمىستارىنا دا كوڭىل ءبولىندى. اۋماقتا سۋارۋ جۇيەسى تارتىلىپ، 4 قاراشا كۇنى «تازا قازاقستان» اكتسياسى اياسىندا 60 ءتۇپ اعاش وتىرعىزىلدى. ولاردىڭ قاتارىندا شىرشا، جوكە، قايىڭ، شاعان جانە تەرەك بار.
تۇرعىنداردىڭ ايتۋىنشا، بۇعان دەيىن بۇل جەر قوقىسقا تولىپ، بالالاردىڭ ويناۋىنا قولايسىز بولعان.
«بۇرىن بالالاردىڭ وينايتىن جەرى جوق ەدى. بۇل الاڭ بوس جاتتى، قوقىسقا تولىپ تۇراتىن. ەندى بالالار ءۇشىن وسىنداي ادەمى ورىن جاسالدى. مۇندا تازا ءارى قاۋىپسىز، ويىن الاڭى دا بار. قازىر اعاشتار وتىرعىزىلىپ جاتىر. ۋاقىت وتە كەلە ناعىز جاسىل باققا اينالاتىن ءتۇرى بار»، — دەدى قالا تۇرعىنى مۇحاررام بايزاقوۆ.
اللەيانىڭ اشىلۋ سالتاناتىندا اقتوبە قالاسىنىڭ اكىمى ازامات بەكەت بۇل جەر تەلىمدەرىنىڭ قالاداعى حالىق تىعىز ورنالاسقان اۋماقتا، سونداي-اق ءاليا مولداعۇلوۆا اتىنداعى حالىقارالىق اۋەجايعا اپاراتىن نەگىزگى كوشەلەردىڭ بويىندا ورنالاسقانىن اتاپ ءوتتى.
«وسىعان بايلانىستى بۇل اۋماقتا تۇرعىنداردىڭ دەمالۋىنا ارنالعان قوعامدىق كەڭىستىك قالىپتاستىرىپ، قالانىڭ ساۋلەتتىك كەلبەتىن جاقسارتۋ تۋرالى شەشىم قابىلدانعان بولاتىن. بيىل دەمەۋشى تارتىلىپ، اۋماقتى اباتتاندىرۋ جۇمىستارى جۇرگىزىلدى.
قازىرگى تاڭدا مۇندا تۇرعىنداردىڭ سەرۋەندەۋىنە ارنالعان جاياۋ جۇرگىنشىلەر جولى سالىنىپ، برۋسچاتكا توسەلدى. ورىندىقتار، قوقىس جاشىكتەرى مەن شاعىن ساۋلەتتىك نىساندار ورناتىلدى. سونداي-اق ساياباق شامدارى قويىلىپ، بۇعان دەيىن كوكتەم-كۇز مەزگىلدەرىندە باتپاققا اينالىپ، قاراڭعى بولىپ تۇراتىن اۋماق جارىقتاندىرىلدى.
بۇدان بولەك، سۋارۋ جۇيەسى تارتىلىپ، كوگالداندىرۋ جۇمىستارى جۇرگىزىلدى. بالالار ويىن الاڭى مەن سپورتپەن شۇعىلدانۋعا ارنالعان ۆوركاۋت الاڭى ورناتىلدى.
قالا بويىنشا جەر تەلىمدەرىن مەملەكەت مەنشىگىنە قايتارۋ جۇمىستارى جالعاسىپ جاتىر. بيىلدىڭ وزىندە 125 جەر ۋچاسكەسى قايتارىلدى. ولاردىڭ جالپى اۋماعى 90 گەكتاردى قۇرايدى. بۇل — ءارتۇرلى ماقساتتاعى جەرلەر. ونىڭ ىشىندە باس جوسپارعا سايكەس كەلمەيتىن نەمەسە يگەرىلمەگەن ۋچاسكەلەر دە بار. بۇل باعىتتاعى جۇمىستار جالعاسىن تابادى»، — دەدى قالا اكىمى ازامات بەكەت.
وسىلايشا، بۇرىن قاراۋسىز قالعان اۋماق تۇرعىنداردىڭ دەمالىسى مەن سەرۋەندەۋىنە ارنالعان جاڭا قوعامدىق كەڭىستىككە اينالدى. ال 30 تىلدە جازىلعان «سالەم» ءسوزى بار جارىق ينستاللياتسياسى اللەيانىڭ ەرەكشە نىشانى بولماق.
