تۇركىستان وبلىسىندا وتكەن تويلاردىڭ بىرىندە ءداستۇرلى توي فورماتىن سىنعا الىپ، ونەر يەلەرىن «شايتاننىڭ ازانشىسى» دەپ اتاعان ەر ادامعا قاتىستى قىلمىستىق ءىس قوزعالدى، دەپ حابارلايدى «ادىرنا» ءتىلشىسى.
ىشكى ىستەر مينيسترلىگى ەر ادامنىڭ سوزدەرىندە ءدىني جانە الەۋمەتتىك الاۋىزدىقتى قوزدىرۋ بەلگىلەرى بايقالعاندىقتان، قىلمىستىق ءىس قوزعالعانىن مالىمدەدى.
«ادامنىڭ ار-نامىسىن قورلاۋعا، ءدىني، الەۋمەتتىك نەمەسە وزگە دە بەلگىلەرى بويىنشا كەمسىتۋگە باعىتتالعان كەز كەلگەن جاريا ۇندەۋلەر، سونداي-اق قوعامدىق كەلىسىم مەن بىرلىككە نۇقسان كەلتىرۋى مۇمكىن ارەكەتتەرگە جول بەرىلمەيدى»، – دەپ مالىمدەدى ءىىم.
مينيسترلىك وكىلدەرى ءسوز بوستاندىعى زاڭ تالاپتارىن بۇزۋعا قۇقىق بەرمەيتىنىن اتاپ ءوتىپ، مۇنداي مالىمدەمەلەردىڭ بارلىعىنا قۇقىقتىق تۇرعىدان ءتيىستى باعا بەرىلەتىنىن جەتكىزدى.
ەسكە سالايىق، تۇركىستان وبلىسىنداعى تويدان تۇسىرىلگەن ۆيدەو الەۋمەتتىك جەلىلەردە ۇلكەن رەزونانس تۋدىرعان بولاتىن. جەتىسايداعى تويدا قالىڭدىقتىڭ تۋىسى قوناقتاردى مۋزىكادان باس تارتۋعا جانە ەرلەر مەن ايەلدەردى بولەك وتىرعىزۋعا شاقىرعان.
بۇعان دەيىن بۇل جاعدايعا پرەزيدەنت اكىمشىلىگى باسشىسىنىڭ ءبىرىنشى ورىنباسارى ەرلان قارين مەن قمدب وكىلدەرى دە پىكىر بىلدىرگەن ەدى.
