ء«ادىل ءسوز» ءسوز بوستاندىعىن قورعاۋ حالىقارالىق قورى Aiel-qorgan.kz سايتىن «قازاقستانداعى ايەل جۋرناليستەرگە قاتىستى ونلاين زورلىق-زومبىلىقتىڭ الدىن الۋ: ونلاين زورلىق-زومبىلىققا دەن قويۋ ورتالىعى» جوباسى اياسىندا ىسكە قوسادى.
جوبا كاسىبي قىزمەتىنە بايلانىستى كيبەربۋللينگكە، ونلاين-قۋدالاۋعا، قوقان-لوقىعا، الەۋمەتتىك جەلىلەردەگى قىسىمعا جانە تسيفرلىق زورلىق-زومبىلىقتىڭ باسقا دا تۇرلەرىنە تاپ بولاتىن ايەل جۋرناليستەردى قولداۋعا باعىتتالعان.
جۋرناليستەرگە قارسى ونلاين-شابۋىلدار ءسوز بوستاندىعى مەن مەديا قاۋىپسىزدىگى سالاسىنداعى وزەكتى ماسەلەلەردىڭ ءبىرى بولىپ وتىر. مۇنداي شابۋىلدار ولاردىڭ كاسىبي بەدەلىنە عانا ەمەس، جەكە ومىرىنە، پسيحولوگيالىق جاعدايىنا جانە قاۋىپسىزدىگىنە اسەر ەتۋى مۇمكىن. كوپ جاعدايدا ايەل جۋرناليستەر بۇل ماسەلەمەن جالعىز قالىپ، قايدا جۇگىنۋ كەرەگىن جانە ونلاين زورلىق-زومبىلىق فاكتىسىن قالاي دۇرىس تىركەۋ قاجەتتىگىن بىلە بەرمەيدى.
وسى ماقساتتا Aiel-qorgan.kz پلاتفورماسى ازىرلەندى. بۇل – جۋرناليستەرگە تۇسىنىكتى نۇسقاۋلىقتار، پايدالى ماتەريالدار جانە قولداۋ الۋ مۇمكىندىگىن ۇسىناتىن اقپاراتتىق ءارى پراكتيكالىق پلاتفورما. جوبانىڭ ماقساتى – ايەل جۋرناليستەردىڭ تسيفرلىق ورتاداعى قاۋىپسىزدىگىن ارتتىرۋ، ونلاين-قاۋىپتەردىڭ ءارتۇرلى تۇرلەرىن تانۋعا، شابۋىلدارعا دۇرىس ارەكەت ەتۋگە جانە دەر كەزىندە قۇقىقتىق، پسيحولوگيالىق ءارى اقپاراتتىق قولداۋ الۋعا كومەكتەسۋ.
سايتتا ونلاين زورلىق-زومبىلىق تۇرلەرى تۋرالى ماتەريالدار، شابۋىل كەزىندەگى ارەكەت الگوريتمدەرى، تسيفرلىق قاۋىپسىزدىك بويىنشا ۇسىنىمدار، پايدالى نۇسقاۋلىقتار، مونيتورينگ ناتيجەلەرى جانە قولجەتىمدى كومەك تەتىكتەرى تۋرالى اقپارات ورنالاستىرىلادى.
سايتتى كىمدەر پايدالانا الادى؟
سايت ەڭ الدىمەن ونلاين-قاۋىپتەرگە تاپ بولعان نەمەسە تسيفرلىق قاۋىپسىزدىگىن الدىن الا كۇشەيتكىسى كەلەتىن قازاقستانداعى ايەل جۋرناليستەرگە، رەداكتورلارعا، بلوگەرلەرگە، مەديا قىزمەتكەرلەرىنە جانە باق وكىلدەرىنە ارنالعان.
سونىمەن قاتار پلاتفورما رەداكتسيالار، مەديا ۇيىمدار، قۇقىق قورعاۋشىلار، قاۋىپسىزدىك سالاسىنداعى ساراپشىلار، جۋرناليستيكا وقىتۋشىلارى جانە تسيفرلىق ورتادا جۋرناليستەردى قورعاۋ تاقىرىبىمەن اينالىساتىن بارلىق ماماندار ءۇشىن پايدالى بولادى. جوبا اياسىندا رەداكتسيالارمەن ىنتىماقتاستىققا ەرەكشە نازار اۋدارىلادى. پلاتفورمادا سەرىكتەس باق كەيستەرىن ورنالاستىرۋ، سونداي-اق ناقتى رەداكتسيالاردىڭ قاجەتتىلىگىنە بەيىمدەلگەن قاۋىپسىزدىك ۇسىنىمدارى مەن ستراتەگيالارىن ازىرلەۋ جوسپارلانىپ وتىر.
ء«بىزدىڭ مىندەتىمىز – ونلاين-شابۋىلعا تاپ بولعان ايەل ءجۋرناليستىڭ جالعىز قالماۋىنا جاعداي جاساۋ. ونىڭ قولىندا ناقتى ارەكەت الگوريتمى، قولداۋ الۋ مۇمكىندىگى جانە ءوزىنىڭ قاۋىپسىزدىگى ماڭىزدى ەكەنىن سەزىنۋى قاجەت», - دەپ اتاپ ءوتتى ء«ادىل ءسوز» قورى.
جوبا قازاقستانداعى گەرمانيا فەدەراتيۆتىك رەسپۋبليكاسى ەلشىلىگىنىڭ قارجىلىق قولداۋىمەن ء«ادىل ءسوز» ءسوز بوستاندىعىن قورعاۋ حالىقارالىق قورى تاراپىنان جۇزەگە اسىرىلادى.
Aiel-qorgan.kz سايتى قازاقستاندا ونلاين زورلىق-زومبىلىقتىڭ الدىن الۋ، قاۋىپسىز تسيفرلىق ورتانى دامىتۋ جانە ايەل جۋرناليستەردى قورعاۋدى كۇشەيتۋ باعىتىنداعى كەڭ اۋقىمدى جۇمىستىڭ ءبىر بولىگىنە اينالادى.
