رەسەي پرەزيدەنتى ۆلاديمير پۋتين قورعانىس مينيسترلىگىنىڭ باسشىلىق قۇرامىمەن وتكەن كەزدەسۋدە قارۋلى كۇشتەردەگى بىرقاتار جوعارى لاۋازىمعا جاڭا ادامداردى تاعايىندادى، دەپ حابارلايدى "ادىرنا" ۇلتتىق پورتالى.
بۇل تۋرالى كرەملدىڭ ءباسپاسوز قىزمەتى حابارلادى.
جاڭا شەشىمگە سايكەس، ۋكرايناداعى اسكەري ءىس-قيمىلدارعا قاتىسىپ جاتقان «ورتالىق» اسكەرلەر توبىنىڭ قولباسشىسى بولىپ گەنەرال-پولكوۆنيك اندرەي يۆاناەۆ تاعايىندالدى. ول بۇعان دەيىن «شىعىس» اسكەرلەر توبىن باسقارعان.
ال «شىعىس» اسكەرلەر توبىنىڭ جاڭا قولباسشىسى قىزمەتىنە وسى توپتىڭ بۇرىنعى شتاب باستىعى پەتر بولگارەۆ بەكىتىلدى.
سونىمەن قاتار قورعانىس ءمينيسترىنىڭ ۇسىنىسى بويىنشا اسكەري تىل قىزمەتتەرىن باسقارۋ بىرىڭعاي قۇرىلىمعا بىرىكتىرىلدى. تىل قىزمەتتەرىنىڭ قولباسشىسى بولىپ گەنەرال-پولكوۆنيك ۆالەري سولودچۋك تاعايىندالدى. ول بۇعان دەيىن «ورتالىق» اسكەرلەر توبىنا جەتەكشىلىك ەتكەن.
بۇدان بولەك، ۇشقىشسىز قۇرالدار جۇيەسى كۇشتەرىنىڭ قولباسشىسى قىزمەتىنە گەنەرال-پولكوۆنيك دەنيس ليامين تاعايىندالدى. بۇعان دەيىن ول ورتالىق اسكەري وكرۋگى شتابىنىڭ باستىعى بولعان.
سونداي-اق رەسەي قورعانىس ءمينيسترىنىڭ ورىنباسارى الەكسەي كريۆورۋچكونىڭ قۇزىرەتى وزگەرتىلدى. ەندى ول ارميانى اسكەري-تەحنيكالىق قامتاماسىز ەتۋ ماسەلەلەرىنىڭ ورنىنا پەرسپەكتيۆالى قارۋ-جاراق، اسكەري جانە ارنايى تەحنيكانى دامىتۋ باعىتىنا جاۋاپ بەرەدى.
"رەسەي سوعىستى توقتاتۋ كەلىسسوزىنە دايىن". ءپۋتيندى كوندىرۋگە ترامپتىڭ ءبىر جازباسى جەتكىلىكتى بولدى
