ارمەنيا پرەمەر-ءمينيسترى نيكول پاشينيان ارمەنيا مەن ازەربايجان اراسىنداعى قاقتىعىس كەزەڭى اياقتالىپ، ەكى ەل اراسىندا بەيبىتشىلىك ورناعانىن مالىمدەدى، دەپ حابارلايدى "ادىرنا" ۇلتتىق پورتالى.
جەرگىلىكتى باق مالىمەتىنشە، پرەمەر-مينيستر بەيبىتشىلىككە قول جەتكىزۋ وڭاي بولماعانىمەن، ونى بۇزۋ وتە جىلدام جۇزەگە اسۋى مۇمكىن ەكەنىن ايتقان.
«كەز كەلگەن بەيبىتشىلىكتى ورناتۋ قيىن. ءبىزدىڭ بەيبىتشىلىگىمىزدى ورناتۋ دا وڭاي بولعان جوق. الايدا كەز كەلگەن بەيبىتشىلىكتى بۇزۋ جانە جويۋ وتە وڭاي. مۇنى قىسقا ۋاقىتتا جاساۋعا بولادى. بۇل جاعدايدا 35 جىلدان كەيىن بەيبىتشىلىكتى قايتا قالپىنا كەلتىرە الامىز با دەگەن سۇراق تۋىندايدى»، – دەدى ارمەنيا ۇكىمەتىنىڭ باسشىسى.
پاشينيان بەيبىتشىلىك ۇدەرىسىنە قوسقان ۇلەسى ءۇشىن اقش پرەزيدەنتى دونالد ترامپقا العىس ءبىلدىرىپ، ارمەنيا جانە ازەربايجان حالىقتارىن 8 تامىزداعى تاريحي وقيعامەن قۇتتىقتادى.
«اقىرى بىزدە الاۋىزدىقتى قوزدىرمايتىن، كەرىسىنشە تىنىشتىق سىيلايتىن كۇن پايدا بولدى. قاقتىعىستىڭ بارلىق قۇرباندارى بەيبىتشىلىكپەن تىنىشتىق تاپسىن. ەندى ەشقاشان قايتالانباسىن. جاساسىن بەيبىتشىلىك» – دەدى ول.
پرەمەر-مينيستر 2025 جىلدىڭ 8 تامىزىندا ۆاشينگتوندا اقش، ارمەنيا جانە ازەربايجان باسشىلارىنىڭ قاتىسۋىمەن وتكەن ۇشجاقتى كەزدەسۋدى ەكى ەل اراسىنداعى قارىم-قاتىناس تاريحىنداعى بەتبۇرىس كەزەڭ دەپ اتادى.
ونىڭ ايتۋىنشا، ەندى 8 تامىزداعى كەزدەسۋدى «بەيبىتشىلىك ءسامميتى»، ال ارمەنيا مەن ازەربايجان كوشباسشىلارى قابىلداعان جانە اقش پرەزيدەنتى كۋاگەر رەتىندە قول قويعان بىرلەسكەن دەكلاراتسيانى «بەيبىتشىلىك دەكلاراتسياسى» دەپ اتاۋعا بولادى.
پاشينيان قول جەتكىزىلگەن بەيبىتشىلىك ناتيجەلەرى قازىردىڭ وزىندە سەزىلىپ وتىرعانىن اتاپ ءوتتى. دەگەنمەن ەكى ەل اراسىنداعى بەيبىتشىلىك پەن مەملەكەتارالىق قاتىناستاردى تۇپكىلىكتى بەكىتەتىن كەلىسىمگە ءالى قول قويىلىپ، ول راتيفيكاتسيالانعان جوق. سونىمەن قاتار مەملەكەتتىك شەكارانى دەليميتاتسيالاۋ پروتسەسى دە اياقتالماعان.
ارمەنيا پرەمەر-ءمينيسترى ءسامميتتىڭ نەگىزگى ناتيجەلەرىنىڭ ءبىرى رەتىندە «ترامپتىڭ حالىقارالىق بەيبىتشىلىك پەن وركەندەۋ جولى» (TRIPP) جوباسىن اتادى. ونىڭ پىكىرىنشە، بۇل جوبا جاقىن ارادا ارمەنيانىڭ بلوكادادان شىعۋىنا مۇمكىندىك بەرىپ قانا قويماي، ەل مەن ءوڭىر ەكونوميكاسىنىڭ ماڭىزدى تىرەگىنە اينالۋى مۇمكىن.
