كراسنودار ولكەسىنىڭ 50 جاستاعى تۇرعىنى قازاقستاننان زاڭسىز شىعۋعا ارەكەت جاساعانى ءۇشىن سوتتالدى. ول شەكارا بەكەتىندە وزىنە تيەسىلى ەمەس، اپكەسىنىڭ قۇجاتىن كورسەتكەن، دەپ حابارلايدى "ادىرنا".
رەسەي ازاماتى قازاقستانعا اتا-بابالارىنىڭ قابىرىن زيارات ەتۋ ءۇشىن كەلگەن. الايدا كوشى-قون تالاپتارىن بۇزعاندىقتان، ەلدەن زاڭدى تۇردە شىعا الماعان.
وسىدان كەيىن ايەل قازاقستاننان پويىزبەن شىعۋعا شەشىم قابىلداعان. شەكارالىق باقىلاۋ كەزىندە ول قىزمەتكەرلەرگە اپكەسىنىڭ پاسپورتىن ۇسىنعان. الايدا شەكاراشىلار قۇجاتتىڭ باسقا ادامعا تيەسىلى ەكەنىن انىقتاپ، ايەلدىڭ ارەكەتىن اشكەرەلەگەن.
وقيعاعا بايلانىستى قىلمىستىق ءىس قوزعالىپ، ماتەريالدار سوتقا جولداندى.
سوت رەسەيلىك ازاماتشانى 6 ايعا باس بوستاندىعىنان ايىرۋعا ۇكىم شىعاردى. الايدا ول راقىمشىلىققا ءىلىنىپ، جازادان بوساتىلدى.
سونىمەن بىرگە سوت ايەلدى قازاقستان اۋماعىنان ءماجبۇرلى تۇردە شىعارۋ تۋرالى شەشىم قابىلدادى. وعان قازاقستانعا 5 جىل مەرزىمگە كىرۋگە تىيىم سالىندى.
وسىلايشا، باسقا ادامنىڭ قۇجاتىن پايدالانىپ شەكارادان وتۋگە ارەكەت جاساعان ايەل ەلدەن شىعارىلىپ، وعان بەس جىلعا قازاقستانعا قايتا كىرۋگە شەكتەۋ قويىلدى.
