فوتو: ماڭعىستاۋ وبلىستىق ەكولوگيا دەپارتامەنتى
7 تامىزدا ماڭعىستاۋ وبلىسىنداعى قۇلجان مۇناي كەن ورنىندا ءورت شىقتى. ءورت "Meerbusch" جشس-ءنىڭ مۇناي قابىلداۋ پۋنكتىندە بولعان، دەپ حابارلايدى "ادىرنا".
الدىن الا مالىمەت بويىنشا، ءورت رۆس №2 سىيىمدىلىعى 2000 تەكشە مەترلىك رەزەرۆۋاردىڭ تۇبىندەگى شوگىندىلەردى تازالاۋ جۇمىستارى كەزىندە تسا-320 تسەمەنتتەۋ اگرەگاتىندا تۇتانعان. جۇمىس جۇرگىزىلگەن ساتتە رەزەرۆۋار بوس بولعان، وندا مۇناي بولماعان.
زارداپ شەككەندەر جوق. ءورت ساعات 19:20-دا وقشاۋلانىپ، 20:00-دە تولىق ءسوندىرىلدى. قازىرگى ۋاقىتتا نىسان شتاتتىق رەجيمدە جۇمىس ىستەپ تۇر. الدىن الا مالىمەت بويىنشا، ايتارلىقتاي ماتەريالدىق شىعىن انىقتالماعان، دەپ حابارلادى وبلىستىق ەكولوگيا دەپارتامەنتى.
مۇنايدىڭ تەحنولوگيالىق جابدىقتار مەن نىسان اۋماعىنان تىس جەرگە توگىلۋىنە جول بەرىلمەدى.
وقيعا تۋرالى ماڭعىستاۋ وبلىسىنىڭ توتەنشە جاعدايلار دەپارتامەنتى مەن مەملەكەتتىك ەڭبەك ينسپەكتسياسىنا حابارلانعان.
ءورتتىڭ شىعۋ سەبەبى، كەلتىرىلگەن زالالدىڭ ىقتيمال كولەمى جانە وقيعاعا قۇقىقتىق باعا نىساندى تەكسەرۋ مەن زەرتتەۋ جۇمىستارى اياقتالعاننان كەيىن انىقتالادى.
