Microsoft كورپوراتسياسىنىڭ نەگىزىن قالاۋشىلاردىڭ ءبىرى، ميللياردەر بيلل گەيتس وتكەن اپتادا موڭعولياعا بارىپ، بايان-ولگي، دۋندگوۆ جانە دورنود ايماقتارىنا ساپار شەكتى. بۇل تۋرالى MongolianNews جازدى، دەپ حابارلايدى «ادىرنا» ءتىلشىسى.
رەسمي دەرەككوزدەردىڭ مالىمەتىنشە، كاسىپكەردىڭ جەكە ۇشاعى 9 تامىزدا ەل استاناسىنداعى بۋيانت-ۋحاا اۋەجايىنا قونعان.
«بيلل گەيتس موڭعولياعا سەرىكتەرىمەن بىرگە كەلگەن. قازىرگى ۋاقىتتا ول ەلدىڭ باتىسىنداعى بايان-ولگي ايماعىندا ءجۇر. بەكىتىلگەن مارشرۋتقا سايكەس، ميللياردەر بۇدان كەيىن ورتالىقتاعى دۋندگوۆ وڭىرىنە جانە شىعىستاعى دورنود ايماعىنا بارۋدى جوسپارلاپ وتىر»،–دەلىنگەن حابارلامادا.
ازىرگە بيلل گەيتستىڭ موڭعولياعا ساپارىنىڭ ناقتى ماقساتى مەن ونىڭ قاشان اياقتالاتىنى جاريالانعان جوق.
ميللياردەر موڭعولياعا ءوزىنىڭ فلاگماندىق Gulfstream G650ER الىس قاشىقتىققا ارنالعان بيزنەس-دجەتىمەن كەلگەن. ۇشاق N887GV تىركەۋ نومىرىمەن (سەريالىق ءنومىرى – 6357) Mente LLC كومپانياسىنىڭ اتىنا راسىمدەلگەن. بۇل كومپانيا بيلل گەيتستىڭ اۋە پاركىن باسقارادى.
