Temu ماركەتپلەيسى ەۋروپادا ساتىپ الۋشىلارىنان ايىرىلىپ جاتىر. قىتايلىق ساۋدا پلاتفورماسىنىڭ تانىمالدىعى تومەندەپ بارا جاتقانى تۋرالى نيدەرلاند پەن پولشا بۇقارالىق اقپارات قۇرالدارى جازۋدا. ساراپشىلار مۇنىڭ نەگىزگى سەبەپتەرى رەتىندە ەۋروپالىق وداق ەنگىزگەن باج سالىعىنا بايلانىستى تاۋارلاردىڭ قىمباتتاۋىن جانە «جاڭالىق اسەرىنىڭ» باسەڭدەۋىن اتايدى.
2026 جىلعى 1 شىلدەدەن باستاپ ەۋروپالىق وداقتا شەتەلدەن قۇنى 150 ەۋروعا دەيىنگى سالەمدەمەلەرگە 3 ەۋرو كولەمىندە بەلگىلەنگەن باج سالىعى ەنگىزىلدى. بۇل شارا، ەڭ الدىمەن، Temu مەن Shein سياقتى قىتايلىق ماركەتپلەيستەردىڭ جەرگىلىكتى نارىقتارعا ەكسپانسياسىن تەجەۋگە باعىتتالعان.
«ەۋروپالىق وداققا كۇن سايىن قۇنى تومەن ميلليونداعان سالەمدەمە جەتكىزىلەدى. ولاردىڭ كوپشىلىگىندە ەو قاۋىپسىزدىك ستاندارتتارىنا سايكەس كەلمەيتىن، قۇنى تومەندەتىلىپ كورسەتىلگەن نەمەسە كەدەندىك باج سالىعىن اينالىپ ءوتۋ ءۇشىن جالعان دەكلاراتسيالانعان تاۋارلار بار.
سونىمەن قاتار قازىرگى قولدانىستاعى باج سالىعىنان بوساتۋ ءتارتىبى ەو-عا كىرمەيتىن ەلدەردىڭ ساتۋشىلارىنا ەۋروپادا تاۋار وندىرەتىن نەمەسە ساتاتىن كاسىپورىندارعا قاراعاندا ادىلەتسىز ارتىقشىلىق بەرەدى.
ەو بىرىڭعاي نارىقتى نىعايتۋ جانە ەۋروپادا تاۋارلار مەن قىزمەتتەردى ساتاتىن بارلىق كومپانيالاردىڭ قاۋىپسىزدىك پەن سايكەستىك تالاپتارىن ساقتاي وتىرىپ، تەڭ جاعدايدا باسەكەلەسۋىن قامتاماسىز ەتۋ ءۇشىن كەدەندىك راسىمدەردى جاڭعىرتۋ جۇمىستارىن جۇرگىزىپ جاتىر»، – دەپ بۇعان دەيىن ەۋروپالىق باق جازعان.
ەنگىزىلگەن شارالار ناتيجە بەرە باستاعان. RTL Nieuws جۇرگىزگەن ساۋالناماعا سايكەس، شىلدەدە جاڭا باج سالىعى ەنگىزىلگەننەن بەرى نيدەرلاند تۇرعىندارىنىڭ 46 پايىزى Temu, Shein جانە AliExpress سەكىلدى قىتايلىق ينتەرنەت-دۇكەندەردەن تاۋارعا تاپسىرىس بەرۋدى سيرەتكەن. سونىمەن قاتار ساۋالناماعا قاتىسقانداردىڭ باسىم بولىگى جاڭا باج سالىعىن قولدايتىنىن ايتقان. مۇنداي پىكىردى رەسپوندەنتتەردىڭ 67 پايىزى بىلدىرگەن.
ساۋالناماعا قاتىسقانداردىڭ 64 پايىزى Temu مەن Shein-دەگى تاۋارلاردىڭ ساپاسى وتە تومەن ەكەنىن اتاپ وتكەن. رەسپوندەنتتەردىڭ ءبىرى جاساندى گۇلگە تاپسىرىس بەرگەنىن، الايدا ونىڭ ورنىنا جاپسىرما كەلگەنىن ايتقان. تاعى ءبىرى فۋتبولكالاردىڭ ساپاسى سونشالىقتى ناشار بولعانىن، ءتىپتى ولار «كۇرىش قاعازىنان جاسالعانداي» كورىنگەنىن ەسكە العان.
ساۋالناماعا قاتىسقانداردىڭ شامامەن تورتتەن ءۇشى (73%) Temu مەن Shein-دەگى تاۋارلاردىڭ باعاسى ولاردىڭ ساپاسىنا سايكەس كەلمەيتىنىن ايتقان. ۇشتەن ءبىرى قىتايلىق ماركەتپلەيستەردەگى تاۋارلاردىڭ قاۋىپسىزدىگىنە الاڭدايتىنىن بىلدىرگەن.
رەسپوندەنتتەردىڭ شامامەن 10 پايىزى جىلدام ءسان يندۋسترياسى ىنتالاندىراتىن شامادان تىس تۇتىنۋدىڭ قورشاعان ورتاعا اسەرىنە الاڭدايدى. ال 7 پايىزى قىتايداعى ەڭبەك جاعدايلارىنىڭ تالاپقا ساي بولماۋىنا قاتىستى الاڭداۋشىلىق بىلدىرگەن.
پولشادا دا Temu-عا قىزىعۋشىلىق تومەندەدى
پولشادا دا جاعداي ۇقساس. سوڭعى ءبىر ايدىڭ وزىندە Temu پايدالانۋشىلارىنىڭ سانى 3,5 ميلليونعا ازايىپ، سوڭعى ءبىر جارىم جىلداعى ەڭ تومەنگى كورسەتكىشكە جەتكەن. نارىقتى Mediapanel Gemius زەرتتەگەن.
«بۇل ءبىر رەتتىك قۇلدىراۋ ەمەس، التى اي بويى جالعاسىپ كەلە جاتقان جۇيەلى تومەندەۋ. بۇل پلاتفورما دامۋىنىڭ بەلگىلى ءبىر كەزەڭى پولشادا اياقتالىپ كەلە جاتقانىن كورسەتەدى. جاڭالىق اسەرى السىرەپ بارادى. ونىڭ سەبەبى ماركەتينگكە جۇمسالاتىن شىعىنداردىڭ قىسقارۋى ەمەس سياقتى. Gemius دەرەكتەرىنە سايكەس، Temu پولشاداعى ينتەرنەت-جارناماعا ەڭ كوپ قارجى جۇمسايتىن كومپانيالاردىڭ قاتارىندا ءالى دە بار. پايدالانۋشىلار سانى وسى شىعىندارعا قاراماستان ازايىپ جاتىر»، – دەيدى تسيفرلىق كوممەرتسيا سالاسىندا جۇمىس ىستەيتىن Fast White Cat كومپانياسىنىڭ باس كونسۋلتانتى ءارى باسقارما مۇشەسى ياكۋب رايسكي.
پولشانىڭ IT سالاسىنداعى Univio كومپانياسىنىڭ ستراتەگيالىق كەڭەسشىسى ءارى نارىق ساراپشىسى سەباستيان بلاشكەۆيچ Temu-عا دەگەن قىزىعۋشىلىقتىڭ ايتارلىقتاي تومەندەۋى تەك ەۋروپادا عانا بايقالمايتىنىن اتاپ ءوتتى. ونىڭ ايتۋىنشا، ماركەتپلەيستىڭ اگرەسسيۆتى جارناماسى دا بۇرىنعىداي ناتيجە بەرمەي وتىر.
«Temu پولشاداعى پوزيتسياسىن ەكى نەگىزگى فاكتورعا سۇيەنىپ قالىپتاستىردى: جارناماعا كوپ قاراجات جۇمساۋ جانە كليەنتتەردىڭ تارتىمدى ۇسىنىستارعا تاۋەلدىلىگى. 2026 جىلى وسى ەكى فاكتور دا ايتارلىقتاي السىرەي باستادى. بۇل پلاتفورمانىڭ ءوسۋ قارقىنىنا اسەر ەتىپ وتىر. بار بولعانى بەس ايدىڭ ىشىندە Temu پولشادا 3,6 ميلليون پايدالانۋشىسىنان ايىرىلدى»، – دەيدى سەباستيان بلاشكەۆيچ.
ساراپشىلاردىڭ پىكىرىنشە، قازىرگى كورسەتكىشتەر الداعى ۋاقىتتا بۇدان دا اۋقىمدى وزگەرىستەردىڭ باستاماسى بولۋى مۇمكىن.
قازاقستانعا دا اسەرى بار
قازاقستاندا دا، باسقا دا بىرقاتار ەلدەردەگىدەي، قىتايلىق ماركەتپلەيستەردىڭ جەرگىلىكتى نارىقتارعا جىلدام ەنىپ جاتقانى بايقالادى. ساراپشىلاردىڭ پىكىرىنشە، بۇل بولاشاقتا وتاندىق كاسىپكەرلەردىڭ ءبىر بولىگىنىڭ جابىلۋىنا، سونىڭ سالدارىنان جۇمىسسىزدىقتىڭ وسۋىنە جانە بيۋدجەتكە تۇسەتىن سالىق كولەمىنىڭ ازايۋىنا اكەلۋى مۇمكىن.
سونىمەن قاتار قازىرگى ۋاقىتتا قازاقستاندىق كاسىپكەرلەر شەتەلدىك باسەكەلەستەرىنە قاراعاندا ءتيىمسىز جاعدايدا تۇر. وتاندىق كومپانيالار الەۋمەتتىك اۋدارىمداردى قوسا العاندا، سالىقتاردىڭ تولىق پاكەتىن تولەيدى. ال شەتەلدىك كومپانيالار نەگىزىنەن ققس-قا تەڭ «Google سالىعىن» عانا تولەيدى.
بۇل ماسەلەگە دەپۋتات ازات پەرۋاشەۆ بىرنەشە رەت نازار اۋدارعان.
ء«بىز ەرەجەلەردىڭ ءادىل، جاعدايدىڭ تەڭ بولعانىن قالايمىز. ءبىزدىڭ كاسىپكەرلەرگە ەڭ بولماعاندا تولەيتىن سالىقتىق جۇكتەمە بويىنشا شەتەلدىك باسەكەلەستەرىمەن تەڭ جاعداي جاساڭىزدار. سودان كەيىن تۇتىنۋشى ءۇشىن كۇرەسسىن. ال ولاردىڭ باسەكەلەستەرىنە باستاپقىدان ءتيىمدى جاعداي جاسالىپ، ولار باعانى دەمپينگ ارقىلى تومەندەتە الاتىن بولسا، ارينە، ءبىزدىڭ كاسىپكەرلەردىڭ جاعدايى اۋەل باستان شەكتەلەدى»، – دەگەن ەدى ول.
