قازاقستاندىق شاحماتشى ءبيبىسارا اساۋباەۆا اقش-تىڭ سەنت-لۋيس قالاسىندا ءوتىپ جاتقان بەدەلدى Cairns Cup 2026 تۋرنيرىندە العاشقى جەڭىسىنە قول جەتكىزىپ، كوشباسشىلار قاتارىنا قوسىلدى، دەپ حابارلايدى "ادىرنا".
ءتورتىنشى تۋردا اق فيگۋرالارمەن ويناعان اساۋباەۆا شۆەيتساريانىڭ بۇرىنعى الەم چەمپيونى، بليتستەن ەكى دۇركىن الەم چەمپيونى الەكساندرا كوستەنيۋكتى جەڭدى. كەزدەسۋ 23-ءشى جۇرىستە كوستەنيۋكتىڭ بەرىلۋىمەن اياقتالدى.
بۇعان دەيىن قازاقستاندىق شاحماتشى اننا مۋزيچۋك، رامەشبابۋ ۆايشالي جانە امەريكالىق ەليس ليمەن كەزدەسىپ، ۇشەۋىمەن دە تەڭ تۇسكەن ەدى.
ءتورت تۋردان كەيىن اساۋبەۆانىڭ ەنشىسىندە 2,5 ۇپاي بار. بۇل ناتيجە ونى تۋرنير كەستەسىندە ءتورتىنشى ورىنعا شىعاردى. ال كوش باستاپ تۇرعان قىتايدىڭ بۇرىنعى الەم چەمپيونى تان چجۋني 3,5 ۇپاي جيناعان.
بەسىنشى تۋردا اساۋبەۆا قارا فيگۋرالارمەن ءۇندىستاننىڭ گروسسمەيستەرى ديۆيا دەشمۋحكە قارسىلاس بولادى. بۇل كەزدەسۋ قازاقستاندىق شاحماتشى ءۇشىن تۋرنيردەگى ماڭىزدى سىناقتاردىڭ ءبىرى بولماق.
Cairns Cup 2026 تۋرنيرىنە الەمنىڭ ۇزدىك ون شاحماتشىسى قاتىسىپ، جارىس اينالمالى جۇيە بويىنشا وتۋدە. تۋرنير 19 تامىزدا مارەسىنە جەتەدى. جارىستىڭ جالپى جۇلدە قورى – 250 مىڭ دوللار، ال جەڭىمپازعا 60 مىڭ دوللار بەرىلەدى.
ايتا كەتەيىك، 29 ماۋسىمدا ءبيبىسارا اساۋباەۆا II دارەجەلى «بارىس» وردەنىمەن ماراپاتتالعان بولاتىن. بۇعان دەيىن شاحماتشى جالاقىسىنىڭ قىسقارعانىن ايتىپ، قازاقستان پرەزيدەنتى قاسىم-جومارت توقاەۆتان كومەك سۇراعان ەدى.
