ىلە الاتاۋىنىڭ بوكتەرىندە قالىقتاعان ۇشاقتار، جوعارى پيلوتاج ەلەمەنتتەرى، توپتىق ۇشۋلار مەن پاراشيۋتشىلەردىڭ بيىكتەن سەكىرۋى – الماتى وبلىسىندا ءداستۇرلى «بايسەركە اسپانى» اۋە شوۋى ءوتتى. بيىل كورەرمەنگە اسەرلى اۆياتسيالىق باعدارلاما ۇسىنىلىپ قانا قويماي، الداعى قۇرىلتاي دەپۋتاتتارىنىڭ سايلاۋىنا دا نازار اۋدارىلدى.
23 تامىزعا بەلگىلەنگەن داۋىس بەرۋگە ءبىر اپتادان از ۋاقىت قالدى. وسىعان وراي 10 مىڭنان استام كورەرمەن جينالعان اۋە شوۋىندا جۇرتشىلىققا الداعى سايلاۋ تۋرالى دا ۇندەۋ جاسالدى. اۋە ايلاعىنا كاسىبي ۇشقىشتار، پاراشيۋتشىلەر، اۆياتسيا سالاسىنىڭ ماماندارى مەن ءوڭىردىڭ مىڭداعان تۇرعىنى جينالدى. ولاردىڭ اراسىندا وتباسىمەن كەلگەندەر دە كوپ.
اۋە شوۋىنىڭ ەڭ اسەرلى ساتتەرىنىڭ ءبىرى – قازاقستاننىڭ مەملەكەتتىك تۋىن الىپ ۇشقان مي-2 تىكۇشاعىنىڭ كوككە كوتەرىلۋى بولدى. ارتىنشا تىكۇشاق «جاڭارۋعا داۋىس بەر!» دەگەن جازۋى بار باننەردى الىپ ۇشتى. بۇل اۋە پەرفومانسى قۇرىلتاي دەپۋتاتتارىنىڭ العاشقى سايلاۋىنا ارنالدى. ۇيىمداستىرۋشىلار كورەرمەندەردى ازاماتتىق بەلسەندىلىك تانىتىپ، 23 تامىزدا داۋىس بەرۋگە قاتىسۋعا شاقىردى.
ودان كەيىن اۋە شوۋىنىڭ نەگىزگى باعدارلاماسى باستالدى. كورەرمەندەر كۇنى بويى ءتۇرلى اۋە كەمەلەرىنىڭ مۇمكىندىكتەرىن تاماشالادى. اسپانعا مي-2 تىكۇشاعى، ان-2, Socata, ياك-18ت، ياك-52 جانە ياك-55 ۇشاقتارى، سونداي-اق موتودەلتاپلاندار كوتەرىلدى. ۇشقىشتار جەكە جانە توپتىق ۇشۋلار جاساپ، جوعارى پيلوتاج ەلەمەنتتەرىن كورسەتتى. كەيبىرى ساپ تۇزەپ ۇشسا، ەندى ءبىرى اسپاندا ءتۇتىن ىزدەرىن قالدىردى. ۇشۋلار 100-دەن 1400 مەترگە دەيىنگى بيىكتىكتە ورىندالدى. باعدارلامانىڭ تاعى ءبىر اسەرلى بولىگى – ان-2 ۇشاعىنان پاراشيۋتشىلەردىڭ سەكىرۋى بولدى. ولار 1000 مەتردەن استام بيىكتىكتەن سەكىردى.
جەردەگى باعدارلاما دا قىزىققا تولى بولدى. اەرودروم اۋماعىندا اۆياتسيالىق تەحنيكا كورمەسى ۇيىمداستىرىلىپ، قوناقتار ءتۇرلى تيپتەگى ۇشاقتار مەن تىكۇشاقتاردى جاقىننان كورىپ، ولاردىڭ قۇرىلىمىمەن تانىستى. سونداي-اق ۇشقىشتار مەن اۆياتسيا سالاسىنىڭ وزگە دە ماماندارىنىڭ جۇمىسى تۋرالى اقپارات الدى. كورمە اسىرەسە بالالار مەن جاستاردىڭ ەرەكشە قىزىعۋشىلىعىن تۋدىردى.
ايتا كەتەيىك، اۋە شوۋىنا قازاقستاننىڭ ۇشقىش-عارىشكەرى ايدىن ايىمبەتوۆ، «وتان» اەروكلۋبى قوعامدىق بىرلەستىگىنىڭ جەتەكشىسى يۋري ەلتسوۆ، «تيان-شان» اۆياتسيالىق ورتالىعىنىڭ باس ديرەكتورى ۆلاديمير انتسۋپوۆ، قازاقستان شاعىن اۆياتسيا قاۋىمداستىعىنىڭ پرەزيدەنتى ومىربەك كەڭەسباەۆ، سونداي-اق اۆياتسيا قاۋىمداستىعىنىڭ وكىلدەرى قاتىستى.
ءىس-شارانىڭ نەگىزگى تاقىرىپتارىنىڭ ءبىرى – قازاقستانداعى شاعىن اۆياتسيانى دامىتۋ بولدى. قاتىسۋشىلار جاستار اراسىندا اۆياتسيالىق جانە تەحنيكالىق ماماندىقتاردى تانىمال ەتۋ، اۆياتسيالىق مادەنيەتتى قالىپتاستىرۋ جانە سالانى ودان ءارى دامىتۋ ماسەلەلەرىن تالقىلادى. سونداي-اق مۇنداي ءىس-شارالاردىڭ الماتى وبلىسىنىڭ تۋريستىك تارتىمدىلىعىن ارتتىرۋداعى الەۋەتىنە ەرەكشە نازار اۋدارىلدى.
قوناقتار ءۇشىن ويىن-ساۋىق جانە ينتەراكتيۆتى الاڭدار جۇمىس ىستەپ، ءتۇرلى ۇتىس ويىندارى مەن DJ-سەتتەر ۇيىمداستىرىلدى. كەلۋشىلەر كۇنى بويى اۋە كەمەلەرىنىڭ ۇشۋىن تاماشالاپ، اۆياتسيالىق تەحنيكامەن تانىسىپ، سالا ماماندارىمەن تىلدەسە الدى.
وسىلايشا، ءداستۇرلى «بايسەركە اسپانى» اۋە شوۋى بيىل دا وڭىردەگى كوپشىلىك اسىعا كۇتكەن اۋقىمدى شارالاردىڭ بىرىنە اينالدى. بيىلعى شارادا كورەرمەندەر اۋە تەحنيكاسىنىڭ مۇمكىندىگى مەن ۇشقىشتاردىڭ شەبەرلىگىن تاماشالاپ، اۆياتسيا سالاسىمەن جاقىنىراق تانىستى. سونىمەن قاتار ماڭىزدى ۇندەۋ دە ايتىلدى: 23 تامىزدا قازاقستاندىقتار ەلىمىزدىڭ جاڭا ءبىر پالاتالى پارلامەنتى – قۇرىلتاي دەپۋتاتتارىنىڭ العاشقى سايلاۋىنا قاتىسادى.
