ماڭعىستاۋ وبلىسىندا ءوڭىردىڭ سۋ قاۋىپسىزدىگىن نىعايتۋعا، اقتاۋ قالاسىن سۋمەن جابدىقتاۋدىڭ تۇراقتىلىعىن ارتتىرۋعا جانە كاسپي تەڭىزى دەڭگەيىنىڭ تومەندەۋى جاعدايىندا «ماەك» جشس-ءنىڭ تۇراقتى جۇمىسىن قامتاماسىز ەتۋگە باعىتتالعان ينفراقۇرىلىمدىق جوبالار جۇزەگە اسىرىلۋدا.
ماڭعىستاۋ وبلىسىنىڭ اكىمى نۇرداۋلەت قيلىباي «ماەك» جشس اۋماعىندا بولىپ، سۋ جيناۋ ينفراقۇرىلىمىن جاڭعىرتۋ جانە كەرى وسموس تەحنولوگياسى نەگىزىندە جاڭا تۇششىتۋ ستانتسياسىن سالۋ جوبالارىنىڭ ىسكە اسىرىلۋ بارىسىمەن تانىستى.
نەگىزگى جوبالاردىڭ ءبىرى – №1 سۋ جيناۋ كانالىنا ىرگەلەس كانال سالۋ. جوبا اياسىندا قولدانىستاعى كانالدىڭ تەرەڭدىگى 1,5 مەتردەن 4 مەترگە دەيىن ۇلعايتىلىپ، ۇزىندىعى 650 مەترگە جەتكىزىلەدى. قۇرىلىس جۇمىستارىن 2027 جىلى اياقتاۋ جوسپارلانعان.
سونىمەن قاتار №2 سۋ جيناۋ كانالىنا ىرگەلەس كانال سالۋ جۇمىستارى جۇرگىزىلۋدە. جوبانىڭ ماقساتى – «ماەك»-كە تۇسەتىن سۋ كولەمىنىڭ تۇراقتىلىعىن قامتاماسىز ەتىپ، كاسپي تەڭىزىنىڭ تايىزدانۋىنىڭ اسەرىن بارىنشا ازايتۋ.
جوبا ەكى كەزەڭنەن تۇرادى. ءبىرىنشى كەزەڭدە ۇزىندىعى 900 مەتر ۋچاسكەدە ءتۇبىن تەرەڭدەتۋ جۇمىستارى جۇرگىزىلەدى. ەكىنشى كەزەڭدە كانال تەڭىز باعىتىنا قاراي 1410 مەترگە ۇزارتىلادى. قازىرگى ۋاقىتتا قۇرىلىس جۇمىستارىنىڭ 65 پايىزى ورىندالعان.
سۋ قاۋىپسىزدىگىن نىعايتۋدىڭ تاعى ءبىر ماڭىزدى باعىتى – «ماەك» اۋماعىندا كەرى وسموس تەحنولوگياسى نەگىزىندە جاڭا تۇششىتۋ ستانتسياسىن سالۋ. جوبا تاۋلىگىنە 24 مىڭ تەكشە مەتر پەرمەات وندىرۋگە مۇمكىندىك بەرەدى.
قازىرگى ۋاقىتتا قاجەتتى جابدىقتاردىڭ ءبىر بولىگى جەتكىزىلىپ، مونتاجداۋ جۇمىستارى جۇرگىزىلۋدە. قۇرىلىس-مونتاج جۇمىستارىنىڭ 30 پايىزى ورىندالعان.
جاڭا ستانتسيانىڭ ىسكە قوسىلۋى تۇششى سۋ ءوندىرۋ كولەمىن ارتتىرىپ، قولدانىستاعى ديستيللياتسيالىق تۇششىتۋ قوندىرعىلارىنا تۇسەتىن جۇكتەمەنى ازايتۋعا جانە ولاردى كەزەڭ-كەزەڭىمەن جوندەۋگە مۇمكىندىك بەرەدى. بۇل سۋمەن جابدىقتاۋ جۇيەسىنىڭ سەنىمدىلىگىن ارتتىرىپ، اقتاۋ تۇرعىندارىن اۋىزسۋمەن تۇراقتى قامتاماسىز ەتۋگە قوسىمشا مۇمكىندىك بەرەدى.
جوبالاردىڭ ماڭىزدىلىعى كاسپي تەڭىزى دەڭگەيىنىڭ تومەندەۋى جاعدايىندا ارتا تۇسۋدە. تەڭىز دەڭگەيىنىڭ وزگەرۋى سۋ جيناۋ قۇرىلىستارىنىڭ جۇمىسىنا جانە وڭىردەگى سۋمەن جابدىقتاۋ جۇيەسىنىڭ تۇراقتىلىعىنا تىكەلەي اسەر ەتەدى.
جوبالاردىڭ ىسكە اسىرىلۋ بارىسىمەن تانىسقان وبلىس اكىمى سۋمەن جابدىقتاۋ جۇيەسىنىڭ سەنىمدىلىگى ءوڭىردىڭ الەۋمەتتىك-ەكونوميكالىق قاۋىپسىزدىگىن قامتاماسىز ەتۋدەگى نەگىزگى مىندەتتەردىڭ ءبىرى ەكەنىن اتاپ ءوتتى.
– كاسپي تەڭىزى دەڭگەيىنىڭ تومەندەۋى ماڭعىستاۋدىڭ سۋ قاۋىپسىزدىگىنە تىكەلەي اسەر ەتەدى. مۇنداي جاعدايدا «ماەك»-ءتىڭ تۇراقتى جۇمىسىن قامتاماسىز ەتۋ – ءوڭىر ءۇشىن ستراتەگيالىق مىندەت. كاسىپورىننىڭ سەنىمدى جۇمىسىنا اقتاۋدىڭ سۋ جانە ەنەرگەتيكالىق جۇيەلەرىنىڭ تۇراقتىلىعى تىكەلەي بايلانىستى. سوندىقتان سۋ جيناۋ كانالدارىنىڭ قۇرىلىسىن ۋاقتىلى اياقتاپ، جاڭا وندىرىستىك قۋاتتاردى ىسكە قوسۋ قاجەت. باستى باسىمدىق – حالىقتى ساپالى اۋىزسۋمەن ۇزدىكسىز قامتاماسىز ەتۋ. جوبالاردى ىسكە اسىرۋ كەزىندە قۇرىلىس ساپاسىنا، جۇمىستاردىڭ بەلگىلەنگەن قارقىنمەن جۇرگىزىلۋىنە جانە بولىنگەن قاراجاتتىڭ ءتيىمدى پايدالانىلۋىنا ەرەكشە نازار اۋدارۋ قاجەت. ءاربىر نىسان بەلگىلەنگەن مەرزىمدە اياقتالىپ، ءوڭىر تۇرعىندارى ءۇشىن ناقتى ناتيجە بەرۋگە ءتيىس، – دەدى نۇرداۋلەت قيلىباي.
وبلىس اكىمى جاۋاپتى مەملەكەتتىك ورگاندار مەن مەردىگەر ۇيىمدارعا جۇمىستاردى قاجەتتى قارقىنمەن جۇرگىزۋدى، تۋىنداعان ماسەلەلەردى جەدەل شەشۋدى، قۇرىلىس ساپاسىنا باقىلاۋدى كۇشەيتۋدى جانە بەلگىلەنگەن مەرزىمدەردىڭ بۇزىلۋىنا جول بەرمەۋدى تاپسىردى.
جوبالاردىڭ ىسكە اسىرىلۋى ماڭعىستاۋدىڭ سۋ شارۋاشىلىعى ينفراقۇرىلىمىن نىعايتىپ، «ماەك»-ءتىڭ تۇراقتى جۇمىسىن قامتاماسىز ەتۋگە جانە ۇزاق مەرزىمدى پەرسپەكتيۆادا اقتاۋدى سۋمەن تۇراقتى جابدىقتاۋعا قوسىمشا كەپىلدىك قالىپتاستىرۋعا مۇمكىندىك بەرەدى.
