ماڭعىستاۋدا 356 مىڭ گەكتارعا جۋىق جەر مەملەكەتكە قايتارىلدى

1817
Adyrna.kz Telegram
فوتو: ماڭعىستاۋ وبلىسى اكىمىنىڭ ءباسپاسوز قىزمەتى
فوتو: ماڭعىستاۋ وبلىسى اكىمىنىڭ ءباسپاسوز قىزمەتى

ماڭعىستاۋدا پايدالانىلماي جاتقان 356 مىڭ گەكتاردان استام اۋىل شارۋاشىلىعى جەرى مەملەكەت مەنشىگىنە قايتارىلدى. بۇل تۋرالى ماڭعىستاۋ وبلىسى اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.

ءوڭىر باسشىسىنىڭ تاپسىرماسىمەن اۋىل شارۋاشىلىعى ماقساتىنداعى جەرلەردى پايدالانۋدى قاداعالايتىن جۇمىس توبى قۇرىلدى. الدىن الا جۇرگىزىلگەن ساراپتاما قورىتىندىسى بويىنشا وبلىستا 973 مىڭ گەكتار اۋىل شارۋاشىلىعى جەرى انىقتالعان. ونىڭ 356 مىڭ گەكتاردان استامى مەملەكەت مەنشىگىنە قايتارىلعان.

اتاپ ايتقاندا، مىنالار مەملەكەت مەنشىگىنە قايتارىلدى:

تۇپقاراعان اۋدانى – 85,3 گا
مۇنايلى اۋدانى – 26,09 گا
بەينەۋ اۋدانى – 33,8 گا
قاراقيا اۋدانى – 171,8 گا
ماڭعىستاۋ وبلىسى – 39,6 گا
جاڭاوزەن - 10 گا.

مونيتورينگ ناتيجەسىندە يگەرىلمەي جاتقان اۋىل شارۋاشىلىعى جەرلەرىنىڭ باسىم بولىگى «سەنەك» جشس (288 946 گا), «تاۋشىق» جشس (247 633 گا) جانە «قاراعانتۇبەك» (212 192 گا) جەرلەرىنە تيەسىلى ەكەنى انىقتالدى. مونيتورينگ، تەكسەرۋدەن كەيىن «سەنەك» جشس 168 946 گەكتار، «تاۋشىق» جشس 70 مىڭ گەكتار جەردى ءوز ەركىمەن مەملەكەتكە قايتاردى.

سونىمەن قاتار جوسپاردان تىس تەكسەرۋ تۋرالى حابارلامادان كەيىن جەرىنىڭ جالپى كولەمى 67 787 گا بولاتىن 85 جەر پايدالانۋشى قولدا بار مالىن يسج بازاسىنا تىركەدى.

«مەملەكەتتىك قوردا 8 ميلليون 667 مىڭ گەكتار جايىلىمدىق جەر بار. وڭىردە اۋىل تۇرعىندارى بوسالقى جەرلەر، سونداي-اق جاقىن ماڭداعى اۋىل شارۋاشىلىعى ۇيىمدارىنىڭ ەسەبىنەن مال جايىلىمىمەن قامتاماسىز ەتىلگەن. ەلدى مەكەندەردى جايىلىمدىق جەرلەرمەن قامتۋدا وتكىر پروبلەمالار جوق. دەگەنمەن ەلدى مەكەندەردىڭ اۋماعىن كەڭەيتۋ ارقىلى قوسىمشا جايىلىمدىق جەرلەرمەن قامتاماسىز ەتۋ جوسپارلانۋدا. قازىرگى تاڭدا الىستاعى جايىلىمدىق جەرلەردى دە اۋىل شارۋاشىلىعى اينالىمىنا تارتۋ، حالىققا پايدالانۋ ماسەلەلەرى پىسىقتالۋدا»، – دەيدى ماڭعىستاۋ وبلىسى جەر رەسۋرستارىن باسقارۋ دەپارتامەنتىنىڭ باسشىسى قاحارمان باعىنوۆ.

بارلىق قايتارىلعان جەرلەر ەندى اۋىل شارۋاشىلىعى مينيسترلىگى مەن تسيفرلىق دامۋ جانە اەروعارىش مينيسترلىگى بىرلەسىپ ازىرلەگەن گەوسەرۆيستە كورسەتىلەدى.

ينتەراكتيۆتى كارتا ازاماتتارعا كەز كەلگەن ۋاقىتتا قايتارىلعان اۋىل شارۋاشىلىعى جەرلەرى بويىنشا مونيتورينگتى جۇزەگە اسىرۋعا مۇمكىندىك بەرەدى جانە وسى ۋچاسكەلەردى الۋ ماقساتىندا جەرگىلىكتى اتقارۋشى ورگاندارعا ءوتىنىش بەرۋ ءۇشىن باعدار بولادى. بۇل جىلدار بويى پايدالانىلماعان اۋىلشارۋاشىلىق جەرلەرىن اينالىمعا تارتۋعا، سونداي-اق تۇرعىنداردى اۋىل شارۋاشىلىعى ءۇشىن قاجەتتى الاڭدارمەن قامتاماسىز ەتۋگە مۇمكىندىك بەرەدى.

پىكىرلەر