ماڭعىستاۋ وبلىسىندا بىرەگەي ءبىلىم بەرۋ جوباسى جۇزەگە اسىرىلادى. جاڭاوزەن قالاسىندا تسيفرلىق ەكونوميكا، جوعارى تەحنولوگيالىق وندىرىستەر جانە بولاشاق ماماندىقتارى ءۇشىن بىلىكتى كادرلار دايارلاۋعا باعىتتالعان جاڭا بۋىننىڭ زاماناۋي پانارالىق IT-كوللەدجى سالىنادى.
جوبانى ماڭعىستاۋ وبلىسىنىڭ اكىمى نۇرداۋلەت قيلىبايعا Halyk قايىرىمدىلىق قورى مەن «تالىمگەر» ورتالىعىنىڭ وكىلدەرى تانىستىردى.
جاڭا IT-كوللەدجى تەحنيكالىق جانە كاسىپتىك ءبىلىم بەرۋدىڭ زاماناۋي مودەلىنە نەگىزدەلىپ، اقپاراتتىق تەحنولوگيالار، ينجەنەريا، جاساندى ينتەللەكت جانە كاسىپكەرلىك باعىتتارىن بىرىكتىرەدى. ستۋدەنتتەر تاڭداعان ماماندىعىنا قاراماستان تسيفرلىق تەحنولوگيالار مەن جاساندى ينتەللەكت قۇرالدارىن مەڭگەرىپ، ولاردى ەكونوميكانىڭ ءتۇرلى سالالارىندا قولدانۋ داعدىلارىن يگەرەدى.
كوللەدجدىڭ ءبىلىم بەرۋ مودەلى ينجەنەرلىك پاندەردى، اقپاراتتىق تەحنولوگيالاردى، جاساندى ينتەللەكتىنى جانە كاسىپكەرلىك داعدىلاردى ءبىرتۇتاس ءبىلىم بەرۋ ۇدەرىسىنە ىقپالداستىراتىن پانارالىق تاسىلگە نەگىزدەلەدى. بۇل تۇلەكتەردىڭ ەڭبەك نارىعىنداعى وزگەرىستەرگە جەدەل بەيىمدەلۋىنە، زاماناۋي ەكونوميكانىڭ تالاپتارىنا ساي جوعارى سۇرانىسقا يە مامان بولىپ قالىپتاسۋىنا مۇمكىندىك بەرەدى.
كەزدەسۋ بارىسىندا وبلىس اكىمى بۇل جوبا ەلدىڭ ادامي كاپيتالدى دامىتۋ، تسيفرلاندىرۋ جانە بىلىكتى كادرلار دايارلاۋ باعىتىنداعى ستراتەگيالىق باسىمدىقتارىنا تولىق سايكەس كەلەتىنىن اتاپ ءوتتى.
– مەملەكەت باسشىسى قاسىم-جومارت توقاەۆ تەحنيكالىق جانە كاسىپتىك ءبىلىم بەرۋدى دامىتۋ، بىلىكتى كادرلار دايارلاۋ جانە زاماناۋي تەحنولوگيالاردى ەنگىزۋ ەلىمىزدىڭ باسەكەگە قابىلەتتىلىگىن ارتتىرۋدىڭ نەگىزگى شارتتارى ەكەنىن بىرنەشە رەت اتاپ ءوتتى. جاڭاوزەندە سالىناتىن IT-كوللەدج وسى ستراتەگيالىق مىندەتتەرگە تولىق سايكەس كەلەدى. بۇل جاي عانا زاماناۋي وقۋ ورنى ەمەس، جاساندى ينتەللەكتىمەن، تسيفرلىق تەحنولوگيالارمەن جانە وزىق ينجەنەرلىك شەشىمدەرمەن جۇمىس ىستەي الاتىن جاڭا بۋىن ماماندارىن دايارلايتىن ورتالىق بولادى. الداعى ونجىلدىقتاردا ءوڭىر مەن ەل ەكونوميكاسىنىڭ دامۋىن ءدال وسىنداي كادرلار ايقىندايدى. ءبىز بۇل جوبانىڭ جۇزەگە اسۋىنا جان-جاقتى قولداۋ كورسەتەمىز. سەبەبى ءبىلىم مەن ادامي كاپيتالعا سالىنعان ينۆەستيتسيا – ماڭعىستاۋ وبلىسى مەن قازاقستاننىڭ بولاشاعىنا سالىنعان ينۆەستيتسيا، – دەدى نۇرداۋلەت قيلىباي.
كوللەدجدە جاساندى ينتەللەكتىنى ءبىلىم بەرۋ ۇدەرىسىنە ەنگىزۋگە ەرەكشە نازار اۋدارىلادى. وقۋ ورنى تەحنيكالىق جانە كاسىپتىك ءبىلىم بەرۋ جۇيەسىندە جاساندى ينتەللەكت تەحنولوگيالارىن قولدانۋ بويىنشا وڭىرلىك قۇزىرەتتەر ورتالىعىنا اينالادى. مۇندا زاماناۋي ءبىلىم بەرۋ ادىستەمەلەرى ەنگىزىلىپ، تسيفرلىق مانساپتىق دامۋ قۇرالدارى ازىرلەنەدى جانە ءومىر بويى ءبىلىم الۋ قاعيداتىنا نەگىزدەلگەن ۇزدىكسىز وقىتۋ مودەلدەرى سىناقتان وتكىزىلەدى.
جوبانىڭ تاعى ءبىر ماڭىزدى باعىتى – ماماندىق تاڭداۋدان باستاپ جۇمىسقا ورنالاسۋعا دەيىن ءبىلىم الۋشىلاردى سۇيەمەلدەۋگە مۇمكىندىك بەرەتىن تسيفرلىق مانساپتىق ناۆيگاتسيا جۇيەسىن ەنگىزۋ. بۇل ءبىلىم بەرۋ ۇيىمدارى، جۇمىس بەرۋشىلەر جانە ءوڭىر ەكونوميكاسىنىڭ قاجەتتىلىكتەرى اراسىنداعى بايلانىستى كۇشەيتۋگە ىقپال ەتەدى.
جوبانىڭ ىسكە اسىرىلۋى ماڭعىستاۋ وبلىسىنداعى تەحنيكالىق جانە كاسىپتىك ءبىلىم بەرۋ جۇيەسىن دامىتۋداعى ماڭىزدى كەزەڭ بولماق. جاڭا IT-كوللەدج تسيفرلىق جانە ينجەنەرلىك قۇزىرەتتەرى جوعارى، تەحنولوگيالىق وزگەرىستەرگە بەيىم، ءوڭىر مەن ەل ەكونوميكاسىنىڭ دامۋىنا ۇلەس قوسا الاتىن بىلىكتى ماماندار دايارلاۋعا مۇمكىندىك بەرەدى.
