تۇركىستان وبلىسى كەلەس اۋدانىنداعى ەسكى مەكتەپتە وقۋ بولمەلەرى جەتىسپەيدى.مەكتەپ باسشىسى بوس جەردىڭ بارىنە پارتا قويىپ، بالالاردى ءۇش اۋىسىممەن وقىتۋعا ءماجبۇر دەپ حابارلايدى “ادىرنا” ۇلتتىق پورتالى كتك تەلەارناسىنا سىلتەمە جاساپ.
35 جىلدان بەرى جوندەۋ كورمەگەن ءبىلىم وشاعىنىڭ توبەسىنەن دە سۋ سورعالاپ تۇر. سونىڭ سالدارىنان عيمارات سىز تارتىپ، قابىرعالارى كوگەرىپ كەتكەن. اپاتتى جاعدايداعى مەكتەپتىڭ بۇگىنگى كەيپى ادام شوشىرلىق. قاۋىنشى اۋىلىندا جالعىز مەكتەپ بار. ونىڭ ءوزىنىڭ توبەسى تەسىك. جاۋىن-شاشىندا سىنىپتاردى سۋ باسادى. وقۋشىلار جاۋىن تيمەيتىن جەرلەرگە جايعاسىپ وقۋعا ءماجبۇر. پارتالاردىڭ جان-جاعىنا قويىلعان سۋ جينايتىن ىدىستار ۇيرەنشىكتى كورىنىسكە اينالعان.
«سۋ تامشىلاعان سوڭ شەلەك قويىپ قويامىز. توبەنى كورىپ وتىرسىزدار، اپاتتىق جاعداي. تەرەزەنىڭ سىلاعى ءتۇسىپ جاتىر. وقۋشىلاردىڭ باسىنا تۇسە مە دەپ قورقامىز. ساباق وقۋعا دا كەدەرگى جاسايدى. كوگەرىپ كەتكەن، سىز ءيىسى بار. وقۋشىلار تىنىس الۋعا قينالادى»، – دەيدى مۇعالىم ايتبەك دۇيسەن.
ۇنەمى ىلعالدا تۇراتىن عيماراتتىڭ قابىرعاسى كوگەرىپ، مەكتەپتى ساسىق ءيىس باسقان. پارتا مەن تاقتالارى دا كەڭەس ۇكىمەتىنەن قالعان. 1986 جىلى سالىنعان ءبىلىم ورداسى سودان بەرى جوندەۋ كورمەپتى. ابدەن توزىعى جەتكەن عيماراتتى مۇعالىمدەر جىل سايىن ءوز كۇشىمەن جاماپ الەك.
مەكتەپتىڭ سپورت زالىن اۋداندىق شەنەۋنىكتەر وسىدان 10 جىل بۇرىن اپاتتى دەپ تانىعان ەكەن. سول ۋاقىتتان بەرى مۇلدەم جوندەۋ كورمەگەن. ۋاقىت وتكەن سايىن سپورت بولمەسى كۇيرەپ، قاقىراپ بارادى. ال جاۋىن-شاشىندا وقۋشىلار دەنە شىنىقتىرۋ پانىندە قولشاتىر ۇستاۋعا ءماجبۇر. 300 ورىندىق مەكتەپتە 700 بالا ءبىلىم الادى. سىنىپ كابينەتتەرى جەتىسپەيدى. ءار بوس بۇرىش وقۋ كابينەتىنە اينالعان. ءتىپتى قويما مەن اجەتحاناعا دەيىن پارتا قويىلىپ، وقۋشىلار ءۇش اۋىسىممەن وقىپ جاتىر. ال مەكتەپتىڭ جاي-كۇيىنە كۇيىنگەن اتا-انالار ۇل-قىزىن وقۋعا جىبەرۋگە قورقادى.
«بۇكىل اۋىل تۇرعىندارى ماسەلە شەشىلمەسە، بالالاردى مەكتەپكە جىبەرە المايمىز دەپ وتىر. ويتكەنى قاۋىپ بار. قۇلاپ كەتۋىنە دە ەشكىم كەپىل بەرمەيدى، توق سوقپاۋىنا دا ەشكىم كەپىل بەرمەيدى. بىزگە ءار بالانىڭ دەنساۋلىعى، اماندىعى كەرەك»، – دەيدى قاۋىنشى اۋىلىنىڭ تۇرعىنى سەيىلحان امانبەرديەۆ.
مەكتەپ باسشىلىعى عيماراتقا كۇردەلى جوندەۋ قاجەت ەكەنىن شەنەۋنىكتەرگە 10 جىلدان بەرى ايتىپ كەلەمىز دەيدى. ال اۋدانداعى ءبىلىم ءبولىمى بار ماسەلە قارجىعا تىرەلەتىنىن ايتادى.
«سمەتاسى كورسەتىلگەن قۇجاتتى وسى جەردەگى كاسىپكەر دەمەۋ كورسەتىپ، ءبىر ايدىڭ ىشىندە ءبىتىرىپ بەرەم دەگەن. كەشە سويلەستىك. تۇگەل، قابىرعاسى، ءىشى-سىرتى، ەدەنى، شاتىرىن ءبارىن جوندەۋگە 11 ميلليون تەڭگە كەرەك»، – دەيدى كەلەس اۋدانى ادامي الەۋەتتى دامىتۋ ءبولىمىنىڭ باسشىسى باقتيار ابديەۆ.
ەندى ءبىر ايدا قۇجاتى جاسالسا، بيىلدان قالدىرماي بيۋدجەتتەن كۇردەلى جوندەۋگە قارجى سۇراتامىز دەيدى. بىراق اقشانىڭ دەرەۋ بولىنەر-بولىنبەسى تاعى بەلگىسىز.
“ادىرنا” ۇلتتىق پورتالى
