“اۋىل بالاسىنا جول اشقان جوبا”
سالتاناتتى ساتتە بالالاردىڭ قۋانىشى ەرەكشە سەزىلدى. GYMNASIADE U15 سايىسىنىڭ جەڭىمپازى نۇرتاس ءالىمباي تولقىنىسىن جاسىرمادى:
«AUYLSPORT جوباسى ارقىلى بۇرىن تەك ارمان بولىپ كورىنگەن دۇنيەلەر شىندىققا اينالدى. ءمينيستردىڭ قولىنان ماراپات الۋ – مەن ءۇشىن قول جەتپەيتىن بيىك سەكىلدى ەدى. بۇگىن سول ارمانىم ورىندالدى. بۇل – تەك مەنىڭ عانا ەمەس، مەن سەكىلدى مىڭداعان اۋىل بالاسىنىڭ ۇمىتىنە جول اشقان جوبا»، – دەدى جاس سپورتشى.
ناتيجەسىمەن دالەلدەنگەن سپورتتىق جوبا
2024 جىلى ىسكە قوسىلعان جوبا قىسقا ۋاقىتتا ەلىمىزدىڭ بارلىق وڭىرلەرىندە كەڭ قولداۋ تاپتى. بۇگىندە 10 مىڭنان استام بالا جۇيەلى تۇردە سپورتپەن اينالىسىپ ءجۇر. جوبانىڭ ايقىن جەتىستىگى سەربياداعى حالىقارالىق گيمنازيادا. قازاقستان قۇراماسىندا ونەر كورسەتكەن 22 سپورتشىنىڭ 12-ءسى – ءدال وسى باستاما اياسىندا تاربيەلەنگەن جاستار.«مينيسترلىك تاراپىنان بەرىلگەن بۇل ماراپات – AUYLSPORT جوباسىنىڭ جاڭا دەڭگەيگە كوتەرىلگەنىنىڭ دالەلى، جوباعا دەگەن سەنىم مەن العىستىڭ بەلگىسى عانا ەمەس، اۋىلداعى جاس دارىنداردىڭ بيىككە ۇمتىلۋىنا بەرىلگەن ۇلكەن سەرپىن. بۇل قۇرمەت – بولاشاق جەڭىستەردىڭ باستاماسى، قازاقستاننىڭ اتىن الەمدىك ارەنالاردا اسقاقتاتاتىن جاڭا ەسىمدەردىڭ جارقىن نەگىزى بولماق»، دەيدى Halyk قورىنىڭ اتقارۋشى ديرەكتورى عالىمبەك جاقسىلىقوۆ.
سپورتتا قالا مەن اۋىل تەڭ
AUYLSPORT باستاماسى تيمۋر قۇلىباەۆتىڭ باستاماسىمەن جۇزەگە اسۋدا. جوبانىڭ العاشقى كەزەڭىندە 200 اۋىلدان 12 مىڭنان استام بالا قاتىستى. Halyk قورى اۋىل سپورتىنا 500 ملن تەڭگەگە جۋىق قارجى ءبولدى.
AUYLSPORT بۇل اۋىل جاستارى ءۇشىن تەك سپورت سەكتسياسى ەمەس، جاڭا ءومىر باعىتى.
Halyk قورىنىڭ قولداۋىمەن جۇزەگە اسقان بۇل باستاما تەڭ مۇمكىندىك پەن تەڭ دارەجەنىڭ ايقىن كورىنىسى.
