قوستاناي وبلىسىندا بالالار مىنگەن اۆتوبۋس ورتەنىپ كەتتى. بۇل تۋرالى وبلىستىق توتەنشە جاعدايلار دەپارتامەنتى ايتتى، دەپ حابارلايدى «ادىرنا» ءتىلشىسى.
ارقالىق-تورعاي باعىتىنداعى جولمەن كەلە جاتقان ءتورت اۆتوبۋستا 77 ادام بولعان.
«بۇگىن ساعات 09:00-دە ميرنىي اۋىلىنان 15 شاقىرىم جەردە «گاز 322131-288» كولىگى ورتەندى دەگەن حابار ءتۇستى. 66 وقۋشى، 3 ۆولونتەر، 6 مۇعالىم، 1 مەديتسينا قىزمەتكەرى، 1 ينسپەكتور مىنگەن ءتورت كولىك اۋىل وقۋشىلارىنا ارنالعان «IQanat» وليمپياداسىنا بارا جاتقان. جۇرگىزۋشى مەن وقىتۋشىلاردىڭ ۇيلەسىمدى جانە دۇرىس ارەكەتتەرىنىڭ ارقاسىندا 12 وقۋشى، 1 جۇرگىزۋشى، 1 وقىتۋشى جانىپ جاتقان گازەلدەن ەۆاكۋاتسيالاندى جانە قالعان 3 كولىككە كوشىپ، كولوننا قۇرامىندا ءجۇرۋدى جالعاستىردى»،—دەدى باسقارمانىڭ ءباسپاسوز قىزمەتى.
توتەنشە جاعدايلار دەپارتامەنتى بارلىق جولاۋشىنىڭ امان-ەسەن سىرتقا شىعىپ ۇلگەرگەنىن ايتتى.
زارداپ شەككەندەر جوق. ءورت ەلەكتر سىمدارىنىڭ قىسقا تۇيىقتالۋىنان تۇتانعان.