الماتىداعى قوعامدىق كولىكتە بولعان توبەلەسكە قاتىستى تەرگەۋ بارىسىندا جاڭا دەرەكتەر بەلگىلى بولدى. پوليتسيا جانجالعا قاتىسقان ءۇش ادامدى ۇستاعاننان كەيىن، ولاردىڭ ءبىرىنىڭ باسقا دا قىلمىستارعا قاتىسى بولۋى مۇمكىن ەكەنىن انىقتاعان، دەپ حابارلايدى "ادىرنا".
بۇعان دەيىن الەۋمەتتىك جەلىلەردە اۆتوبۋستا بىرنەشە ەر ادامنىڭ جانجالداسىپ، توبەلەس شىعارعان ءساتى تۇسىرىلگەن ۆيدەو تاراعان ەدى. كادرلاردا جولاۋشىلاردىڭ كوزىنشە بولعان جانجال كەزىندە ەر ادامداردىڭ ءبىرىنىڭ قولىنان پىشاق كورىنگەن.
وقيعادان كەيىن پوليتسيا ءۇش ادامدى ۇستاپ، جانجالدىڭ ءمان-جايىن انىقتاۋعا كىرىستى. تەكسەرۋ كەزىندە 40 جاستاعى كۇدىكتىنىڭ بۇعان دەيىن ۇرلىق جاساعانى ءۇشىن سوتتالعانى بەلگىلى بولعان.
سونىمەن قاتار، تەرگەۋ ونىڭ توبەلەسكە دەيىن بىرنەشە كۇن بۇرىن جەتىسۋ اۋدانىندا ۆەلوسيپەد ۇرلاعان بولۋى مۇمكىن ەكەنىن كورسەتتى.
جەدەل-ىزدەستىرۋ شارالارى بارىسىندا كۇدىكتىنىڭ الماتىداعى بىرنەشە جانارماي قۇيۋ ستانتسياسىندا جاسالعان ۇرلىقتارعا دا قاتىسى بولۋى ىقتيمال ەكەنى انىقتالعان. بەينەباقىلاۋ جازبالارىندا ەر ادامنىڭ جقس اۋماعىنا كىرىپ، اينالاسىن باقىلاعاننان كەيىن ءتۇرلى تاۋارلاردى الىپ، وقيعا ورنىنان كەتىپ قالعانى كورىنەدى.
پوليتسيا مالىمەتىنشە، وسىنداي جاعدايلاردىڭ بىرىندە جانارماي قۇيۋ ستانتسياسىنىڭ قىزمەتكەرلەرى ونى توقتاتۋعا ارەكەت جاساعان. سول كەزدە ەر ادام پىشاق شىعارىپ، جۇمىسشىلارعا قوقان-لوقى كورسەتكەن.
قازىرگى ۋاقىتتا اتالعان بەينەجازبالار مەن وزگە دە دالەلدەر قىلمىستىق ىسكە تىركەلدى. تەرگەۋ بارلىق ەپيزودتىڭ ءمان-جايىن انىقتاپ، كۇدىكتىنىڭ وسىعان ۇقساس باسقا قىلمىستارعا قاتىسى بار-جوعىن تەكسەرىپ جاتىر.
