الماتىلىقتار ءداستۇر بويىنشا قالا كۇنىن قىركۇيەكتىڭ ءۇشىنشى جەكسەنبىسىندە اتاپ وتەدى. قالا اۋماعىندا كونتسەرتتەر، كورمەلەر، فلەشموبتار، فەستيۆالدەر جانە ءتۇرلى مەرەكەلىك ءىس-شارالار ۇيىمداستىرىلۋدا. مەرەكەلىك باعدارلامالار استانا الاڭىنداعى كونتسەرتپەن باستالدى. وندا قالا اكىمى دارحان ساتىبالدى الماتىلىقتاردى جانە مەگاپوليس قوناقتارىن مەرەكەمەن قۇتتىقتادى.
«بارشاڭىزدى شىن جۇرەكتەن قالا كۇنىمەن قۇتتىقتايمىن! الماتى – تاۋەلسىزدىكتىڭ التىن بەسىگى، ەلىمىزدىڭ جاڭا ءداۋىرى باستالعان شاھار. الماتىنىڭ باستى قۇندىلىعى – ونىڭ تۇرعىندارى. سىزدەردىڭ ەڭبەكتەرىڭىز، باستاماشىلدىقتارىڭىز بەن بەلسەندىلىكتەرىڭىز قالامىزدى جارقىن ءارى قارقىندى دامىپ كەلە جاتقان مەگاپوليسكە اينالدىرۋدا. ءبىز الماتىنى زاماناۋي، جايلى ءارى وركەندەگەن قالا ەتۋ ءۇشىن بار كۇش-جىگەرىمىزدى جۇمساپ كەلەمىز. مەملەكەت باسشىسى قاسىم-جومارت كەمەلۇلى توقاەۆ بىزگە بىرقاتار ماڭىزدى مىندەت جۇكتەدى. سولاردىڭ ىشىندە ەكولوگياعا، قاۋىپسىزدىككە جانە قالالىق ورتانىڭ ساپاسىنا ايرىقشا ءمان بەرىلۋدە»، – دەدى الماتى اكىمى.
دارحان ساتىبالدى اتاپ وتكەندەي، بۇل مىندەتتەردى ورىنداۋ ءۇشىن قالادا بەس نەگىزگى دامۋ باعىتى ايقىندالعان. ولار – كولىكتى جاڭعىرتۋ، ەكولوگيانى جاقسارتۋ، بيزنەستى قولداۋ، الەۋمەتتىك ينفراقۇرىلىمدى جاڭارتۋ جانە تۇرعىندارمەن اشىق ديالوگتى نىعايتۋ. «وسى باسىمدىقتاردى جۇيەلى جۇزەگە اسىرۋ الماتىنى شىنىمەن جاسىل، قاۋىپسىز ءارى ءومىر سۇرۋگە قولايلى مەگاپوليسكە اينالدىرادى»، – دەپ اتاپ ءوتتى قالا اكىمى.
رەسمي بولىمنەن كەيىن اكىم Alma Fest–2025 فەستيۆالىنە قاتىستى. تۇڭعىش پرەزيدەنت ساياباعىندا وتكەن مەرەكەدە فەرمەرلەر 100 تونناعا جۋىق الما اكەلدى. قوناقتار سۇيىكتى سورتتارىنىڭ ءدامىن تاتىپ، ءتۇرلى كورمەلەر مەن ۇلتتىق داستۇرلەرگە تولى ءىس-شارالارعا قاتىستى. ساياباق اۋماعى ءداستۇر بويىنشا ەگىن مەن مادەنيەتتىڭ ۇلكەن مەرەكەسىنە اينالدى. مۇندا الما جارمەڭكەسى، ەتنوايماق، قولدانبالى ونەر بۇيىمدارىنىڭ جارمەڭكەسى، گاسترونوميالىق الاڭدار، بالمۇزداق فەستيۆالى جانە اشىق اسپان استىنداعى كينوتەاتر ۇيىمداستىرىلدى.
جالپى قالا كۇنى اياسىندا الماتىدا مازمۇندى باعدارلاما ازىرلەندى. بارلىق اۋدانداردا ەكولوگيالىق اكتسيالار، جارمەڭكەلەر، فلەشموبتار، كىتاپحانالاردا ادەبي كەشتەر جانە مۇراجايلاردا تاقىرىپتىق كورمەلەر وتۋدە. سونداي-اق، الەۋمەتتىك ماڭىزى بار نىساندار اشىلدى، سپورتتىق جارىستار مەن باسقا دا مادەني ءارى قوعامدىق ءىس-شارالار ۇيىمداستىرىلدى.
