Almatylyqtar dästür boiynşa Qala künın qyrküiektıŋ üşınşı jeksenbısınde atap ötedı. Qala aumaǧynda konsertter, körmeler, fleşmobtar, festivalder jäne türlı merekelık ıs-şaralar ūiymdastyryluda. Merekelık baǧdarlamalar Astana alaŋyndaǧy konsertpen bastaldy. Onda qala äkımı Darhan Satybaldy almatylyqtardy jäne megapolis qonaqtaryn merekemen qūttyqtady.
«Barşaŋyzdy şyn jürekten Qala künımen qūttyqtaimyn! Almaty – Täuelsızdıktıŋ altyn besıgı, elımızdıŋ jaŋa däuırı bastalǧan şahar. Almatynyŋ basty qūndylyǧy – onyŋ tūrǧyndary. Sızderdıŋ eŋbekterıŋız, bastamaşyldyqtaryŋyz ben belsendılıkterıŋız qalamyzdy jarqyn ärı qarqyndy damyp kele jatqan megapoliske ainaldyruda. Bız Almatyny zamanaui, jaily ärı örkendegen qala etu üşın bar küş-jıgerımızdı jūmsap kelemız. Memleket basşysy Qasym-Jomart Kemelūly Toqaev bızge bırqatar maŋyzdy mındet jüktedı. Solardyŋ ışınde ekologiiaǧa, qauıpsızdıkke jäne qalalyq ortanyŋ sapasyna airyqşa män berılude», – dedı Almaty äkımı.
Darhan Satybaldy atap ötkendei, būl mındetterdı oryndau üşın qalada bes negızgı damu baǧyty aiqyndalǧan. Olar – kölıktı jaŋǧyrtu, ekologiiany jaqsartu, biznestı qoldau, äleumettık infraqūrylymdy jaŋartu jäne tūrǧyndarmen aşyq dialogty nyǧaitu. «Osy basymdyqtardy jüielı jüzege asyru Almatyny şynymen jasyl, qauıpsız ärı ömır süruge qolaily megapoliske ainaldyrady», – dep atap öttı qala äkımı.
Resmi bölımnen keiın äkım Alma Fest–2025 festivalıne qatysty. Tūŋǧyş Prezident saiabaǧynda ötken merekede fermerler 100 tonnaǧa juyq alma äkeldı. Qonaqtar süiıktı sorttarynyŋ dämın tatyp, türlı körmeler men ūlttyq dästürlerge toly ıs-şaralarǧa qatysty. Saiabaq aumaǧy dästür boiynşa egın men mädeniettıŋ ülken merekesıne ainaldy. Mūnda alma järmeŋkesı, etnoaimaq, qoldanbaly öner būiymdarynyŋ järmeŋkesı, gastronomiialyq alaŋdar, balmūzdaq festivalı jäne aşyq aspan astyndaǧy kinoteatr ūiymdastyryldy.
Jalpy Qala künı aiasynda Almatyda mazmūndy baǧdarlama äzırlendı. Barlyq audandarda ekologiialyq aksiialar, järmeŋkeler, fleşmobtar, kıtaphanalarda ädebi keşter jäne mūrajailarda taqyryptyq körmeler ötude. Sondai-aq, äleumettık maŋyzy bar nysandar aşyldy, sporttyq jarystar men basqa da mädeni ärı qoǧamdyq ıs-şaralar ūiymdastyryldy.
