پوليتسيا ەليتالىق مەكتەپتە 7 جاسار ۇلىن زورلادى دەگەن ايەلدىڭ مالىمدەمەسىنە قاتىستى تەرگەۋ بارىسىنا تۇسىنىكتەمە بەردى، - دەپ حابارلايدى "ادىرنا" ءتىلشىسى Polisia.kz سايتىنا سىلتەمە جاساپ.
الماتى پوليتسياسى ايەلدىڭ 14 قىركۇيەكتە الماتىداعى حالىقارالىق مەكتەپتە بەلگىسىز بىرەۋدىڭ بالاسىن قورلاعانىن ايتىپ، ارىز جازعانىن حابارلادى. تەرگەۋ باستالىپ، ءىس قوزعالدى. كەلەسى كۇنى بالانى ساراپشىلار كوميسسياسى تەكسەرىپ، ەشقانداي جاراقات، ونىڭ ىشىندە زورلىق-زومبىلىق بەلگىلەرىن تاپپاعان. كوميسسيا تەكسەرۋگە پروكتولوگتى تارتۋ تۋرالى حابارلادى، بىراق بالانىڭ اناسى، پوليتسيانىڭ ايتۋىنشا، جەكە پروكتولوگقا ءوز بەتىنشە جۇگىنىپ، كەيىن تەكسەرىستەن وتۋدەن باس تارتتى.
مەكتەپتە ورناتىلعان كامەرالاردىڭ جازبالارىن تەكسەرگەن پوليتسەيلەر 11-14 قىركۇيەك ارالىعىندا بالانىڭ مەكتەپ دارەتحاناسىنا 2-3 مينۋتا ۋاقىتقا 57 رەت بارعانىن انىقتادى. ونىمەن ءبىر ۋاقىتتا دارەتحاناعا كەلگەن باسقا ادامدار تىركەلمەگەن. مەكتەپ ۇجىمى مەن وقۋشىلارى دا بالاعا قاتىستى زورلىق-زومبىلىقتى جوققا شىعارادى، سوت-بيولوگيالىق جانە مولەكۋليارلىق گەنومدىق ساراپتاما قورىتىندىسى بويىنشا بالانىڭ ءىش كيىمى مەن شالبارىنان تەك وعان تيەسىلى بيوقاباتتار تابىلعان.
ءتارتىپ ساقشىلارى ارىزدانۋشى تاراپىنان بولعان كەدەرگىلەرگە قاراماستان، تەرگەۋ جالعاسىپ جاتقانىن اتاپ ءوتتى. قىلمىستىق ءىس بويىنشا شەشىم قىلمىستىق سوت ءىسىن جۇرگىزۋدىڭ ءۇش ساتىلى مودەلى اياسىندا قاداعالاۋ ورگانىمەن كەلىسە وتىرىپ قابىلداناتىن بولادى.
ەسكە سالايىق، ونىڭ اناسى بۇدان بۇرىن ءبىرىنشى سىنىپ وقۋشىسىنىڭ ءجابىر كورگەنىن ايتقان بولاتىن. ايەل جەتى جاسار بالامەن نە بولعانىن ەگجەي-تەگجەيلى سيپاتتايتىن ۆيدەوعا ءتۇسىرىپ العان.
الماتى پوليتسيا دەپارتامەنتى قىلمىستىق ءىستى بوستاندىق اۋدانى اكىمدىگىنىڭ پوليتسيا ءبولىمى قىلمىستىق كودەكستىڭ 121-بابى «سەكسۋالدىق سيپاتتاعى زورلىق-زومبىلىق ارەكەتتەرى» بويىنشا تەرگەپ جاتقانىن حابارلادى. وقيعاعا كەيىن ءبىلىم مينيسترلىگى تۇسىنىكتەمە بەردى.
