پرەزيدەنت قاسىم-جومارت توقاەۆ وسكەلەڭ ۇرپاقتىڭ پسيحولوگيالىق ساۋلىعى مەن ەموتسيالىق تۇراقتىلىعىن ساقتاۋ ماسەلەسىنە نازار اۋداردى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ ايتۋىنشا، الەۋمەتتىك جەلىلەر، تسيفرلىق پلاتفورمالار، جاساندى ينتەللەكت جانە اگرەسسيۆتى ماركەتينگ بالالاردىڭ دۇنيەتانىمىنا وتباسى مەن مەكتەپتەن كەم اسەر ەتپەيدى.
«وسكەلەڭ ۇرپاقتىڭ پسيحولوگيالىق ساۋلىعى مەن ەموتسيالىق تۇراقتىلىعى، ادامگەرشىلىك تاربيەسى ۇلتتىق قاۋىپسىزدىككە جانە ەلدىڭ ورنىقتى دامۋىنا ىقپال ەتەتىن ماڭىزدى فاكتورعا اينالدى»، – دەدى قاسىم-جومارت توقاەۆ.
پرەزيدەنت قازىرگى جاعداي 2018 جىلى قابىلدانعان «بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى» زاڭدى قايتا قاراۋدى جانە وعان ەلەۋلى وزگەرىستەر ەنگىزۋدى تالاپ ەتەتىنىن اتاپ ءوتتى.
ونىڭ ايتۋىنشا، ۇكىمەت 16 جاسقا تولماعان پايدالانۋشىلارعا الەۋمەتتىك جەلىلەردە تىركەلۋگە تىيىم سالۋدى كوزدەيتىن زاڭ جوباسىن ازىرلەگەن. اتالعان قۇجات بيىل ماۋسىم ايىندا پارلامەنت قاراۋىنا ۇسىنىلعان.
«قۇرىلتايدىڭ ءبىرىنشى سەسسياسىنىڭ اشىلۋىندا دەپۋتاتتارعا وسى ماسەلەنى قاراستىرۋدى ۇسىنامىن»، – دەدى پرەزيدەنت.
قاسىم-جومارت توقاەۆ كوپتەگەن دامىعان ەل وسىنداي شارالاردى قابىلداعانىن اتاپ ءوتىپ، قازاقستانعا دا بالالاردىڭ پسيحولوگيالىق جاي-كۇيىنە تونەتىن قاۋىپتەردىڭ سالدارىمەن عانا كۇرەسپەي، ولاردىڭ الدىن الۋعا كوشۋ قاجەت ەكەنىن ايتتى.
سونىمەن قاتار مەملەكەت باسشىسى ۇكىمەتكە بالالاردى قورعاۋ ءۇشىن ينتەرنەتتەگى كونتەنتتى سۇزگىدەن وتكىزۋ شارالارىن قابىلداۋدى تاپسىردى.
«بەلگىلى ءبىر، مەيلىنشە وبەكتيۆتى سەبەپتەرگە بايلانىستى جاۋاپكەرشىلىكتى اتا-انالارعا عانا ارتىپ قويا المايمىز. سوندىقتان بالالارعا ارنالعان مىندەتتى SIM-كارتالاردى ەنگىزۋ تاجىريبەسىن جاپپاي تاراتۋدى تاپسىرامىن. بۇل ولاردىڭ اقپاراتتىق يممۋنيتەتىن قامتاماسىز ەتە الادى»،– دەدى ول.
