قىرعىزستان استاناسى بىشكەكتە شانحاي ىنتىماقتاستىق ۇيىمىنىڭ ءسامميتى اياسىندا قازاقستان پرەزيدەنتى قاسىم-جومارت توقاەۆ رەسەي باسشىسى ۆلاديمير پۋتينمەن كەزدەستى، دەپ حابارلايدى "ادىرنا" ءتىلشىسى.
بۇل تۋرالى اقوردا حابارلادى.
كەزدەسۋ بارىسىندا تاراپتار قازاقستان مەن رەسەي اراسىنداعى كوپجاقتى ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى. مەملەكەتتەر باسشىلارى ەكىجاقتى قارىم-قاتىناستاردىڭ دوستىق، تاتۋ كورشىلىك جانە وداقتاستىق رۋحىندا نىعايىپ وتىرعانىن ايتتى.
ۆلاديمير پۋتين قاسىم-جومارت توقاەۆتى قۇرىلتاي سايلاۋىنىڭ ءساتتى وتۋىمەن قۇتتىقتادى. رەسەي پرەزيدەنتى سايلاۋ ناتيجەلەرى قازاقستاننىڭ ودان ءارى دامۋىنا، ىشكى ساياسي تۇراقتىلىقتى نىعايتۋعا، ەكونوميكانى وركەندەتۋگە جانە حالىقتىڭ ءال-اۋقاتىن ارتتىرۋعا باعىتتالعان ستراتەگيالىق باعىتىنا حالىقتىڭ كەڭ قولداۋىن كورسەتكەنىن اتاپ ءوتتى.
پرەزيدەنت قاسىم-جومارت توقاەۆ ءوز كەزەگىندە قازاقستانداعى كونستيتۋتسيالىق رەفورمانى جۇزەگە اسىرۋ بارىسىنا توقتالدى.
«قازاقستاندى جاڭعىرتۋ پروتسەسى ۇلتتىق مۇددەلەرگە سايكەس جالعاسادى. رەفورما ءۇشىن رەفورما جۇرگىزۋگە بولمايدى. ەڭ الدىمەن، ازاماتتارىمىزدىڭ مۇددەسىنە باسىمدىق بەرۋىمىز قاجەت»، – دەدى مەملەكەت باسشىسى.
پرەزيدەنت ەكى ەل اراسىنداعى ساۋدا-ەكونوميكالىق بايلانىستاردىڭ دا وڭ ديناميكاسىن اتاپ ءوتتى. ونىڭ ايتۋىنشا، رەسەي قازاقستاننىڭ نەگىزگى ينۆەستيتسيالىق جانە ساۋدا سەرىكتەسى بولىپ قالا بەرەدى.
«مامىر ايىندا استاناعا جاساعان مەملەكەتتىك ساپارىڭىز تولىق تابىستى ءوتتى. ءوزىنىڭ سيپاتى مەن مازمۇنى جاعىنان بۇل ساپار تاريحي بولدى. قازىر ۇكىمەت قول قويىلعان بارلىق كەلىسىمدى ىسكە اسىرۋمەن اينالىسىپ جاتىر. ساۋدا-ساتتىقتىڭ قارقىندى دامىپ كەلە جاتقانىن اتاپ ءوتتىڭىز. وتكەن جىلمەن سالىستىرعاندا ءوسىم بار»، – دەدى قازاقستان باسشىسى قاسىم-جومارت توقاەۆ.
ۆلاديمير پۋتين دە قازاقستان مەن رەسەي اراسىنداعى ىنتىماقتاستىقتىڭ بارلىق باعىت بويىنشا قارقىندى دامىپ كەلە جاتقانىن ايتتى.
رەسەي باسشىسىنىڭ مالىمەتىنشە، ەكى ەل اراسىنداعى تاۋار اينالىمى ءوسىپ كەلەدى. سونىمەن قاتار مەملەكەتتەر ءىرى بىرلەسكەن جوبالار مەن وزەكتى ماسەلەلەر بويىنشا جۇمىس جۇرگىزىپ جاتىر.
پۋتين گۋمانيتارلىق بايلانىستاردىڭ دامۋىنا ەرەكشە توقتالدى. ونىڭ ايتۋىنشا، رەسەيدىڭ جوعارى وقۋ ورىندارىندا قازاقستاننان 60 مىڭ ستۋدەنت ءبىلىم الىپ جاتىر. سونداي-اق ومبىدا قازاقستاننىڭ جەتەكشى جوعارى وقۋ ورىندارىنىڭ ءبىرىنىڭ فيليالى اشىلعان.
كەزدەسۋ سوڭىندا مەملەكەتتەر باسشىلارى ساۋدا-ەكونوميكالىق جانە ينۆەستيتسيالىق ىنتىماقتاستىقتى ودان ءارى نىعايتۋ پەرسپەكتيۆالارىن تالقىلادى. سونداي-اق ءوزارا قىزىعۋشىلىق تۋدىراتىن سالالارداعى بىرلەسكەن جوبالاردى ىسكە اسىرۋ ماسەلەلەرى قارالدى.
