بۇگىن مارات سۇلتانعازيەۆ 2022 جىلعى ماۋسىمنان بەرى باسقارىپ كەلگەن الماتى وبلىسىنىڭ اكىمى قىزمەتىنەن كەتتى. ونىڭ ءتورت جىلدىق باسقارۋ كەزەڭى اكىمشىلىك بولىنىستەن كەيىن ءوڭىردىڭ قالىپتاسۋى جانە وبلىس ورتالىعىنىڭ قوناەۆ قالاسىنا كوشىرىلۋىمەن تۇسپا-تۇس كەلدى. وسى ۋاقىت ىشىندە وبلىس جالپى وڭىرلىك ءونىم كولەمى بويىنشا ەلدەگى ونىنشى ورىننان كوشباسشى بەستىكتىڭ قاتارىنا كوتەرىلىپ، ەكونوميكاسىن ەكى ەسەگە جۋىق ۇلعايتتى جانە ينۆەستيتسيا كولەمىن ەكى ەسەدەن استام ارتتىردى.
2022 جىلى وبلىستىڭ جالپى وڭىرلىك ءونىمى شامامەن 3,4 تريلليون تەڭگەنى قۇراسا، بۇگىندە بۇل كورسەتكىش شامامەن 6,8 تريلليون تەڭگەگە جەتتى. ونەركاسىپ ءوندىرىسىنىڭ كولەمى 1,6 تريلليوننان 2,6 تريلليون تەڭگەگە دەيىن ءوستى. ونىڭ شامامەن 90 پايىزى وڭدەۋ ونەركاسىبىنە تيەسىلى.
وسى كەزەڭدە نەگىزگى كاپيتالعا سالىنعان ينۆەستيتسيا كولەمى 614 ميلليارد تەڭگەدەن 1,35 تريلليونعا ارتتى. وڭىردە جالپى قۇنى 724 ميلليارد تەڭگەنى قۇرايتىن 98 جوبا ىسكە اسىرىلىپ، شامامەن 11 مىڭ جۇمىس ورنى قۇرىلدى.
وبلىستىڭ قارجىلىق بازاسى دا وزگەردى. بيۋدجەتتىڭ مەنشىكتى كىرىستەرى 2,4 ەسە ءوستى، ال رەسپۋبليكالىق بيۋدجەتتەن بەرىلەتىن ترانسفەرتتەردىڭ ۇلەسى 33 پايىزدان 13 پايىزعا دەيىن تومەندەدى. بۇعان دەيىن دونور-اۋماقتار قاتارىندا قاراساي جانە ىلە اۋداندارى بولسا، بۇگىندە ولاردىڭ قاتارىنا ەڭبەكشىقازاق، تالعار، جامبىل اۋداندارى مەن قوناەۆ قالاسى قوسىلدى.
نەگىزگى الەۋمەتتىك ماسەلەلەردىڭ ءبىرى حالىق سانىنىڭ جىلدام وسۋىنە بايلانىستى مەكتەپ تاپشىلىعى بولدى. 2022 جىلى وبلىستا ءۇش اۋىسىمدى 52 مەكتەپ بولسا، قازىر ولاردىڭ سانى 23-كە قىسقاردى. ءتورت جىل ىشىندە 75 مەكتەپ اشىلدى. ونىڭ ىشىندە بيىل جاڭا وقۋ جىلىنىڭ باستالۋىنا دەيىن جالپى 4200 ورىندى بەس مەكتەپ پايدالانۋعا بەرىلدى.
سونىمەن قاتار جاڭا وبلىس ورتالىعىنىڭ ينفراقۇرىلىمى قالىپتاستى. قوناەۆتا ينجەنەرلىك جەلىلەر مەن اكىمشىلىك نىسانداردىڭ قۇرىلىسى باستالدى. الداعى ۋاقىتتا مۇندا تەاتر، «قوناەۆ ارەنا»، وقۋشىلار سارايى جانە باسقا دا الەۋمەتتىك نىساندار سالۋ جوسپارلانۋدا.
ءتورت جىل ىشىندە وبلىستا 3,7 ميلليون شارشى مەتر تۇرعىن ءۇي پايدالانۋعا بەرىلدى. 6,6 مىڭ ازامات باسپانامەن قامتىلدى. ولاردىڭ قاتارىندا الەۋمەتتىك وسال توپ وكىلدەرى دە بار.
الماتى وبلىسى اۋىل شارۋاشىلىعىنىڭ جالپى ءونىم كولەمى بويىنشا قازاقستاندا ەكىنشى ورىندى ساقتاپ، رەسپۋبليكاداعى جالپى كولەمنىڭ 11,6 پايىزىن قامتاماسىز ەتىپ وتىر. 2022-2025 جىلدارى مەملەكەتكە پايدالانىلماي جاتقان 528 مىڭ گەكتار اۋىل شارۋاشىلىعى جەرى قايتارىلدى.
ءتورت جىل ىشىندە سۋارۋ جەلىلەرىن جاڭعىرتۋعا 16,3 ميلليارد تەڭگە باعىتتالدى، ال سۋ ۇنەمدەۋ تەحنولوگيالارى سۋارمالى جەردىڭ 41,2 پايىزىنا ەنگىزىلدى.
تۋريزم سالاسى دا ايتارلىقتاي دامىدى. بيىلعى جازدىڭ وزىندە قاپشاعاي سۋ قويماسىنا ەكى ميلليوننان استام ادام كەلدى.
سونىمەن قاتار كولساي كولدەرى مەن قايىڭدىنىڭ، كوشپەندىلەر قالاشىعىنىڭ ينفراقۇرىلىمى دامىپ، تانىمال تۋريستىك نىساندارعا اپاراتىن جولدار جوندەلدى. الماتى وبلىسى ءىرى سپورتتىق جانە مادەني-بۇقارالىق ءىس-شارالاردى وتكىزۋ الاڭىنا دا اينالدى.
سونىمەن بىرگە حالىق سانى قارقىندى ءوسىپ كەلە جاتقان وبلىس الدىندا جۇيەلى مىندەتتەر ساقتالۋدا. ولاردىڭ قاتارىندا اگلومەراتسياداعى الەۋمەتتىك جانە ينجەنەرلىك ينفراقۇرىلىم تاپشىلىعى، اۋىل شارۋاشىلىعىن سۋمەن قامتاماسىز ەتۋ جانە ءىرى ينۆەستيتسيالىق جوبالاردى تولىق اياقتاۋ قاجەتتىگى بار.
