فوتو: الماتى وبلىسىنىڭ وكق
الماتى وبلىسىنىڭ اكىمى مارات سۇلتانعازيەۆ قوناەۆ قالاسىنداعى №949 سايلاۋ ۋچاسكەسىندە داۋىس بەردى. ءوڭىر باسشىسى ءوز تاڭداۋىن جاساعان سوڭ، جۋرناليستەرگە سايلاۋ بارىسى تۋرالى ايتىپ بەردى.
«بۇگىن – ەلىمىز ءۇشىن ماڭىزدى ساياسي كۇن. مەن دە الماتى وبلىسىنىڭ تۇرعىنى ءارى قازاقستان ازاماتى رەتىندە تىركەلگەن سايلاۋ ۋچاسكەمە كەلىپ، ءوز تاڭداۋىمدى جاسادىم. جالپى ءبىزدىڭ وڭىردە ميلليوننان استام ازامات داۋىس بەرۋگە قۇقىلى. بۇگىن وبلىستا 683 سايلاۋ ۋچاسكەسى جۇمىس ىستەۋدە. سايلاۋشىلارعا قاجەتتى جاعدايدىڭ ءبارى جاسالعان»، – دەدى الماتى وبلىسىنىڭ اكىمى.
سونداي-اق ول بۇگىنگى سايلاۋ ناتيجەلەرى ەلىمىزدىڭ ودان ءارى دامۋىنا وڭ اسەر ەتەتىنىنە سەنىم ءبىلدىردى. بۇل وزگەرىستەر قازاقستان ءۇشىن جاڭا ءارى ماڭىزدى كەزەڭ ەكەنىنە توقتالدى.
«مەملەكەت باسشىسى قاسىم-جومارت كەمەلۇلى توقاەۆ ءوز جولداۋىندا بۇل سايلاۋ ۇلت تاعدىرىنا تىكەلەي اسەر ەتەتىن تاريحي وقيعا ەكەنىن اتاپ ءوتتى. ساياسي شارا قوعامدىق ديالوگتى جاڭا دەڭگەيگە كوتەرىپ، ەلىمىزدىڭ بولاشاعىن بىرگە ايقىنداۋعا مۇمكىندىك بەرەدى»،– دەدى ءوڭىر باسشىسى.
ايتا كەتەيىك، بۇگىن ساعات 07:00-دەن باستاپ الماتى وبلىسىندا 683 سايلاۋ ۋچاسكەسى جۇمىسىن باستادى. سايلاۋ بارىسىن وتاندىق جانە حالىقارالىق بايقاۋشىلار باقىلاپ وتىر.
