ءسۇيىسۋدىڭ عىلىمي انىقتاماسىنان باستاپ، تاراقان ءسۇتىنىڭ قۇرامىنا دەيىن زەرتتەگەن عالىمدار بيىلعى شنوبەل سىيلىعىنىڭ لاۋرەاتتارى اتاندى، دەپ حابارلايدى “ادىرنا”.
سىيلىق بيىل العاش رەت شۆەيتساريانىڭ تسيۋريح قالاسىندا تابىستالدى. سالتاناتتى ءراسىم 3 قىركۇيەكتە ءوتتى.
بيومەحانيكا اتالىمىندا ماتيلدا بريندل، كەترين تالبوت جانە ستيۋارت ۋەست سۇيىسۋگە ناقتىراق عىلىمي انىقتاما ۇسىنعانى ءۇشىن ماراپاتتالدى. عالىمدار قۇبىلىستى ادامداردان بولەك، قۇمىرسقالار، قۇستار جانە اق ايۋلار سياقتى جانۋارلارداعى ۇقساس ارەكەتتەرمەن سالىستىرعان.
ەكونوميكا سىيلىعى پول پيفف، دەنيەل ستانكاتو، ستەفان كوتە، رودولفو مەندوسا-دەنتون جانە دەچەر كەلتنەرگە بەرىلدى. ولار الەۋمەتتىك جاعدايى جوعارى ادامداردىڭ كەيبىر جاعدايلاردا ادەپسىز ارەكەتكە جيىرەك باراتىنىن زەرتتەگەن. ماسەلەن، تاجىريبەلەردە اۋقاتتى ادامداردىڭ باسقا كولىكتەردىڭ جولىن كەسۋى، جاياۋ جۇرگىنشىلەرگە جول بەرمەۋى جانە بالالارعا ارنالعان كامپيتتەردى كوبىرەك الۋى زەرتتەلگەن.
حيميا اتالىمىنىڭ جەڭىمپازدارى تاراقان ءسۇتىنىڭ اقۋىزدارىن زەرتتەگەن عالىمدار بولدى. ساچاري بانەردجي باستاعان زەرتتەۋ توبى ءتىرى تۋاتىن تاراقاننىڭ ءسۇت اقۋىزىندا سيىر ءسۇتىنىڭ اقۋىزىنا قاراعاندا شامامەن ءۇش ەسە كوپ ەنەرگيا بار ەكەنىن انىقتاعان.
مەديتسينا سىيلىعى قايتىس بولعاننان كەيىن جاپون دارىگەرى توكۋدزي ۋننوعا بەرىلدى.
بيولوگيا اتالىمىندا جواۋ ميگەل الۆەس-نۋنەس جانە ونىڭ ارىپتەستەرى ۋلى جىلانداردىڭ ادامدى شاعۋىنا نە سەبەپ بولاتىنىن زەرتتەگەنى ءۇشىن ماراپاتتالدى.
فيزيكا سىيلىعى رەندي حەرد، چجاو پان، تادد تراسكوتت جانە كاۆيشان تۋرايرادجاعا سۇيىقتىق شاشىرامايتىن پيسسۋار جاساۋعا ارنالعان تەوريالىق جانە تاجىريبەلىك زەرتتەۋلەرى ءۇشىن تابىستالدى.
ءيىس سەزۋ اتالىمىنىڭ جەڭىمپازدارى يلونا كروي، توماش فراتسكوۆياك، توماس حۋممەل جانە اگنەشكا سوروكوۆسكا بولدى. ولار اتا-انالاردىڭ نارەستەلەردىڭ ءيىسىن جاعىمدى قابىلدايتىنىن، ال جاسوسپىرىمدەردىڭ ءيىسى ولارعا ۇناي بەرمەيتىنىن زەرتتەگەن.
بەيبىتشىلىك سىيلىعى دجەيمي ارونا كرەمس، رەبەكا حانەل-پەتەرس، لورەون مەرري، كيلا ۋيليامس جانە دەنيەل شنيسەرگە بەرىلدى. عالىمدار ادامداردىڭ وزدەرى ۇناتپايتىن ادامدارعا قارسى قاتال مىنەز كورسەتەتىن دوستاردى باعالايتىنىن زەرتتەگەن.
ايتا كەتەيىك، شنوبەل سىيلىعى — ادامدى الدىمەن كۇلدىرەتىن، كەيىن ويلاندىراتىن عىلىمي زەرتتەۋلەرگە بەرىلەتىن جىل سايىنعى حالىقارالىق ماراپات. ونى 1991 جىلى امەريكالىق عىلىمي جۋرناليست مارك ابراحامس نەگىزىن قالاعان. سىيلىقتىڭ ەرەكشەلىگى — زەرتتەۋلەر ادەتتەن تىس كورىنگەنىمەن، ولاردىڭ ارتىندا ناقتى عىلىمي ىزدەنىس جاتىر.
