9 قىركۇيەكتە الماتىدان لوندونعا بەت العان Air Astana اۋە كومپانياسىنىڭ ۇشاعى فرانكفۋرت قالاسىنا قونۋعا ءماجبۇر بولعان، دەپ حابارلايدى «ادىرنا» ءتىلشىسى.
بۇل جاعدايعا لوندوننىڭ حيتروۋ اۋەجايىنىڭ NOTAM بويىنشا جابىلۋى سەبەپ بولعان.
«الماتى – لوندون باعىتى بويىنشا KC663 رەيسىن ورىنداپ جاتقان Airbus A321 اۋە كەمەسى فرانكفۋرت اۋەجايىنا قاۋىپسىز تۇردە قوندى. اۋە كەمەسىنىڭ بورتىندا 138 جولاۋشى بولدى. وكىنىشكە قاراي، لوندون حيتروۋ اۋەجايى ءتۇننىڭ سوڭىنا دەيىن جابىق كۇيىندە قالادى، وسىعان بايلانىستى Air Astana ءارى قارايعى ۇشۋدى توقتاتۋعا ءماجبۇر. KC663 رەيسىنىڭ ۇشۋى كەلەسى كۇننىڭ تاڭىنا ساعات 11:30-عا (UTC) شەگەرىلدى»،– دەلىنگەن حابارلامادا.
كومپانيا مالىمەتىنشە، 67 جولاۋشىدا جارامدى شەنگەن ۆيزاسى بولماعاندىقتان، ولار فرانكفۋرت اۋەجايىنىڭ ترانزيتتىك ايماعىندا قالۋعا ءماجبۇر.
«بارلىق جولاۋشىعا كۇتۋ ۋاقىتىندا تاماق پەن سالقىن سۋسىندارمەن قامتاماسىز ەتىلۋى ءۇشىن اۋەجايدا تاماقتانۋعا ارنالعان ۆاۋچەرلەر بەرىلدى. اۋەكومپانيانىڭ جەرۇستى قىزمەتتەرى مەن وكىلدەرى قالاعا شىعۋعا قۇقىعى بار جولاۋشىلاردى قوناقۇيمەن قامتاماسىز ەتۋ، سونداي-اق كۇتپەگەن كىدىرىس جاعدايىندا قاجەتتى تاماقپەن، سۋسىندارمەن جانە قولداۋ كورسەتۋ ءۇشىن تاۋلىك بويى جۇمىس ىستەۋدە»،– دەپ تولىقتىردى Air Astana.
