مەملەكەت باسشىسى قاسىم-جومارت توقاەۆ «قازاقستان رەسپۋبليكاسى قاۋىپسىزدىك كەڭەسى اپپاراتىنىڭ كەيبىر ماسەلەلەرى جانە قازاقستان رەسپۋبليكاسى پرەزيدەنتىنىڭ كەيبىر اكتىلەرىنە وزگەرىستەر مەن تولىقتىرۋلار ەنگىزۋ تۋرالى» جارلىققا قول قويدى. بۇل تۋرالى اقوردا جاريالادى، دەپ حابارلايدى "ادىرنا".
جارلىققا سايكەس، قاۋىپسىزدىك كەڭەسى مەن ونىڭ اپپاراتى تۋرالى ەرەجە بەكىتىلىپ، قازاقستان رەسپۋبليكاسى قاۋىپسىزدىك كەڭەسى توراعاسى ورىنباسارىنىڭ وكىلەتتىلىكتەرى ايقىندالدى.
قاۋىپسىزدىك كەڭەسى مەن ونىڭ اپپاراتىنا جاھاندىق سىن-قاتەرلەرگە، ىشكى احۋالدىڭ وزەكتى اسپەكتىلەرىنە جان-جاقتى تالداۋ جۇرگىزۋ مىندەتى جۇكتەلدى.
قاۋىپسىزدىك كەڭەسى توراعاسى ورىنباسارىنىڭ قۇزىرىنا قاۋىپسىزدىك كەڭەسى توراعاسىنىڭ اكتىلەرى مەن تاپسىرمالارىنىڭ، قاۋىپسىزدىك كەڭەسى شەشىمدەرىنىڭ، سونىڭ ىشىندە شۇعىل وتىرىستارىندا قابىلدانعان شەشىمدەردىڭ مۇلتىكسىز ءارى تولىق ورىندالۋىن باقىلاۋ، سونداي-اق ۇلتتىق قاۋىپسىزدىكتى قامتاماسىز ەتۋ، ەلدىڭ قورعانىس قابىلەتىن ارتتىرۋ، زاڭ مەن ءتارتىپتى ساقتاۋ سالالارىنداعى ءىس-شارالاردى جۇزەگە اسىراتىن مەملەكەتتىك ورگاندار مەن ۇيىمداردىڭ قىزمەتىن ۇيلەستىرۋ كىرەدى.
قاۋىپسىزدىك كەڭەسى توراعاسىنىڭ ورىنباسارى اقپاراتتىق جانە كيبەرقاۋىپسىزدىك، سونىڭ ىشىندە جاساندى ينتەللەكتىنى قولدانۋ، دەربەس دەرەكتەردى قورعاۋ، سىبايلاس جەمقورلىق پەن ەكونوميكالىق قىلمىسقا قارسى ءىس-قيمىل، ازاماتتىق قورعانىس ماسەلەلەرىمەن اينالىسادى.
بۇدان بولەك، قاۋىپسىزدىك كەڭەسى توراعاسىنىڭ ورىنباسارى جوعارىدا اتالعان شارالاردى ىسكە اسىراتىن مەملەكەتتىك ورگاندار مەن ۇيىمداردىڭ قىزمەتىن ۇيلەستىرىپ، حالىقارالىق بايلانىس ورناتادى، سونداي-اق قاۋىپسىزدىك كەڭەسى اپپاراتىنىڭ قىزمەتىن ۇيىمداستىرادى.
