سەمەيدە 13 جاستاعى ەكى وقۋشى اراسىندا جانجال بولىپ، ولاردىڭ ءبىرى سىنىپتاسىن پىشاقپەن جارالاعان، دەپ حابارلايدى "ادىرنا" ءتىلشىسى.
وقيعاعا قاتىستى سوتقا دەيىنگى تەرگەۋ باستالدى.
وقيعا مەكتەپتەن تىس جەردە، بالالار ساباقتان كەيىن ۇيلەرىنە قايتىپ بارا جاتقان كەزدە بولعان. الدىن الا مالىمەت بويىنشا، وقۋشىلاردىڭ اراسىندا تۇسىنىسپەۋشىلىك تۋىنداعان.
جاراقات العان بالا كورشى ۇيگە وزدىگىنەن جەتىپ، كومەك سۇراعان. كەيىن ول اۋرۋحاناعا جەتكىزىلدى. بالانىڭ دەنەسىنەن 15 پىشاق جاراقاتى انىقتالعان.
دارىگەرلەردىڭ مالىمەتىنشە، ءجاسوسپىرىمنىڭ ءىش قۋىسىنا پىشاق جاراقاتى ءوتىپ، وڭ جاق بۇيرەگى مەن ءىش مايى زاقىمدانعان. سونداي-اق ءىش قۋىسىنا قان كەتكەن جانە دەنەسى مەن اياق-قولىندا بىرنەشە جاراقات بولعان.
بالاعا ءتورت ساعاتقا جۋىق وپەراتسيا جاسالعان. ول ءۇش تاۋلىك جانساقتاۋ بولىمىندە ەم قابىلدادى. قازىر دارىگەرلەر ونىڭ جاعدايىن ورتاشا اۋىر دەپ باعالاپ وتىر.
وقيعاعا قاتىسقان ەكىنشى وقۋشى دا اۋرۋحاناعا جەتكىزىلگەن. ونىڭ جاراقاتى مەديتسينالىق وڭدەۋدەن وتكىزىلگەننەن كەيىن ۇيىنە جىبەرىلگەن. پوليتسيانىڭ مالىمەتىنشە، ول ۇيىندە ءجۇر جانە قولحات نەگىزىندە باقىلاۋدا.
ەكى ءجاسوسپىرىم دە سەمەيدەگى №52 مەكتەپتىڭ ءبىر سىنىبىندا وقيدى. مەكتەپ اكىمشىلىگىنىڭ مالىمەتىنشە، بالالار بۇعان دەيىن قۇقىق بۇزۋشى رەتىندە ەسەپتە تۇرماعان جانە ءبىر-بىرىمەن دوس بولعان.
پوليتسيا بۇل فاكتى بويىنشا سوتقا دەيىنگى تەرگەۋ جۇرگىزىپ جاتىر. قازىر وقيعانىڭ بارلىق ءمان-جايى انىقتالۋدا.
كامەلەتكە تولماعانداردىڭ قۇقىقتىق مارتەبەسى مەن وقيعاعا قاتىستى تۇپكىلىكتى شەشىم تەرگەۋ ناتيجەسىندە بەلگىلەنەدى.
