ەۋرووداق وڭتۇستىك كاۆكاز بەن ورتالىق ازيانى ەۋروپا نارىعىمەن تىكەلەي بايلانىستىرۋعا ارنالعان ورتا ءدالىزدى دامىتۋ ءۇشىن 12 ميلليارد ەۋروعا دەيىن ينۆەستيتسيا تارتۋدى جوسپارلاپ وتىر. بۇل تۋرالى ەۋروپارلامەنتتە سويلەگەن سوزىندە ەۋروكوميسسيا ءتورايىمى ۋرسۋلا فون دەر ليايەن مالىمدەدى، دەپ حابارلايدى «ادىرنا» ءتىلشىسى Report اگەنتتىگىنە سىلتەمە جاساپ.
«بۇل – كولىك بايلانىسى سالاسىنداعى جاڭا حالىقارالىق جوبا. ول وڭتۇستىك كاۆكاز بەن ورتالىق ازيانى ەۋروپا نارىعىمەن تىكەلەي بايلانىستىرادى. ءبىز ونى ورتا ءدالىز دەپ اتايمىز»، – دەدى ول.
فون دەر ليايەننىڭ ايتۋىنشا، ەۋرووداق بۇل جوباعا مەملەكەتتىك جانە جەكە ينۆەستيتسيالاردى تارتۋ ءۇشىن Global Gateway باستاماسىن پايدالانباق. ينۆەستيتسيا كولەمى 12 ميلليارد ەۋروعا دەيىن جەتۋى مۇمكىن.
ء«بىزدىڭ ماقساتىمىز – باعىتتاردى ءارتاراپتاندىرۋ، ساۋدا اعىندارىن ءۇش ەسە ارتتىرۋ جانە 2030 جىلعا قاراي جۇكتەردى تاسىمالداۋ ۋاقىتىن ەداۋىر قىسقارتۋ»، – دەدى ەۋروكوميسسيا باسشىسى.
سونداي-اق ول بولگاريا پرەمەر-ءمينيسترى رۋمەن رادەۆپەن بىرلەسىپ لوگيستيكا ماسەلەلەرىنە ارنالعان وڭىرلىك سامميت وتكىزىلەتىنىن حابارلادى. ونىڭ سوزىنشە، بۇل جيىن جوبانى ءىس جۇزىندە جۇزەگە اسىرۋعا باعىتتالادى.
فون دەر ليايەن مۇنداي سەرىكتەستىكتەردى دامىتۋدى ەۋرووداقتىڭ جەتكىزۋ تىزبەكتەرىنىڭ تۇراقتىلىعىن كۇشەيتۋ جانە ەكونوميكالىق مۇددەلەرىن قورعاۋ قاجەتتىلىگىمەن بايلانىستىردى.
ايتا كەتەيىك، ورتا ءدالىزدىڭ نەگىزگى ارتىقشىلىعى – ازيا مەن ەۋروپانى كاسپي تەڭىزى، كاۆكاز جانە تۇركيا ارقىلى بايلانىستىراتىن بالاما ترانزيتتىك باعىت بولۋى.
بۇعان دەيىن قازاقستاننىڭ ورتا دالىزگە 12 ملرد دوللاردان استام ينۆەستيتسيا سالۋدى كوزدەپ وتىرعانىن جازعان ەدىك.
