موڭعوليا پرەزيدەنتى ۋحنااگين حۇرەلسۇح بايان-ولگەي ايماعىنا جۇمىس ساپارى اياسىندا مۋزىكالىق-دراما تەاترىندا ايماق تۇرعىندارىمەن كەزدەستى. كەزدەسۋ بارىسىندا مەملەكەت باسشىسى ازاماتتاردى مەملەكەتتىك ساياسات پەن بيلىك ورگاندارىنىڭ قىزمەتى تۋرالى اقپاراتتاندىرىپ، ولاردىڭ ۇسىنىس-پىكىرلەرى مەن تىلەكتەرىن تىڭدادى، دەپ حابارلايدى «ادىرنا» ءتىلشىسى مونتسامەگە سىلتەمە جاساپ.
كەزدەسۋ اياسىندا پرەزيدەنت ەلدىڭ دامۋى مەن وركەندەۋىنە قوسقان ۇلەسى، ادال ەڭبەگى مەن جەتىستىكتەرى ءۇشىن بىرقاتار ازاماتقا مەملەكەتتىك اتاقتار، وردەندەر مەن مەدالدار تابىستادى.
اتاپ ايتقاندا، بايان-ولگەي ايماعىنداعى «باستاما» جالپى ءبىلىم بەرەتىن مەكتەبىنىڭ نەگىزىن قالاۋشى ءارى اتقارۋشى ديرەكتورى بولاتحان اكىمبايعا «موڭعوليانىڭ ەڭبەك سىڭىرگەن مۇعالىمى» قۇرمەتتى اتاعى بەرىلدى.
ايماق حالىق وكىلدەرى حۋرالىنىڭ مۇشەسى جانە «حوتگور» كومپانياسىنىڭ باس ديرەكتورى بالجيننيامىن ەنحبولد «ساۋدا سالاسىنىڭ ەڭبەك سىڭىرگەن قىزمەتكەرى» اتاعىنا يە بولدى.
سونداي-اق موڭعوليا پرەزيدەنتىنىڭ جارلىعىمەن «ەڭبەك قىزىل تۋ» وردەنىمەن:
– «ولگي ويل» كومپانياسىنىڭ اتقارۋشى ديرەكتورى مۇرات قۇرمانحان;
– «ود ديزاين» كومپانياسىنىڭ ساۋلەتشىسى سەرىكباي قابدولحان;
– «حۋحسەرحين ورگيل» كومپانيالارىنىڭ نەگىزىن قالاۋشى شىنات ويزەرمان;
– جەر قاتىناستارى، قۇرىلىس جانە قالا قۇرىلىسى دەپارتامەنتىنىڭ قۇرىلىس جانە قالا قۇرىلىسى ءبولىمىنىڭ باسشىسى، تەحنيكا عىلىمدارىنىڭ دوكتورى، كەڭەسشى-ينجەنەر اسقار كاۋكەن ماراپاتتالدى.
«پوليار جۇلدىزى» وردەنىمەن:
– «ەليف فارم» كومپانياسىنىڭ فارماتسەۆتى باقىتگۇل اعزامحان;
– تسەنگەل سۇمىنىنداعى جالپى ءبىلىم بەرەتىن مەكتەپتىڭ باستاۋىش سىنىپ مۇعالىمى كۇلىماش داسيم;
– «بايانتۋل» كووپەراتيۆىنىڭ مۇشەسى، مالشى دوندونگين مونحجارگال;
– مۋزىكالىق-دراما تەاترىنىڭ مۋزىكانتى باقتىنۇر بادەلحان;
– موڭعوليا مەملەكەتتىك ءبىلىم بەرۋ ۋنيۆەرسيتەتىنىڭ بايان-ولگي ايماعىنداعى فيليالىنىڭ كاسسيرى قۇرمەت اتاباي;
– وقۋ ورتالىعىنىڭ ديرەكتورى باقىتگۇل بەكبولات ماراپاتتالدى.
«اسكەري ەڭبەگى ءۇشىن» وردەنىمەن:
– ايماقتىق توتەنشە جاعدايلار دەپارتامەنتىنىڭ باستىعى، پولكوۆنيك زەينەلين ازات;
– شەكارا اسكەرلەرىنىڭ №0285 اسكەري ءبولىمىنىڭ جۇرگىزۋشىسى، اعا سەرجانت شارحۋگين باتجارگال ناگرادتالدى.
«قۇرمەتتى ەڭبەك مەدالىمەن»:
– ءبىلىم دەپارتامەنتىنىڭ حيميا، بيولوگيا جانە دەنساۋلىق ساقتاۋ باعىتىنا جاۋاپتى اعا ادىسكەرى سەرجان مولايحان ماراپاتتالدى.
كەزدەسۋ بارىسىندا پرەزيدەنت بايان-ولگەي ايماعىنىڭ بارلىق تۇرعىنىن قۇتتىقتاپ، جوعارى مەملەكەتتىك اتاقتار مەن ماراپاتتارعا يە بولعان ازاماتتارعا ىزگى تىلەگىن جەتكىزدى. سونداي-اق ول موڭعوليانىڭ مەملەكەتتىك ساياساتى، مەملەكەتتىك ورگانداردىڭ قىزمەتى جانە ولاردىڭ جۇزەگە اسىرىلۋ بارىسى تۋرالى اقپارات بەردى.
«تاڭەرتەڭ ۇيدەن شىققان ساتتەن كەشكە قايتا ورالعانعا دەيىن مەن موڭعوليامىزدىڭ قاۋىپسىزدىگى مەن تاۋەلسىزدىگىن، حالقىمىزدىڭ بىرلىگىن ويلايمىن. موڭعوليا بەيبىت ءارى قاۋىپسىز مەملەكەت بولىپ قالۋى كەرەك، ال ونىڭ ازاماتتارى باقىتتى ءومىر ءسۇرۋى ءتيىس.
موڭعوليا الداعى ۋاقىتتا دا الەمدەگى ەڭ تىنىش ءارى بەيبىت ەلدەردىڭ ءبىرى بولىپ قالا بەرەدى. ەشكىمنىڭ ازاماتتارىمىزدىڭ بىرلىگىن بۇزىپ، ەلدى ىشتەن ىرىتۋگە قۇقىعى جوق. ءبىزدىڭ ەڭ باستى قۇندىلىقتارىمىز – وتانىمىزدىڭ تاۋەلسىزدىگى، ۇلتتىق بىرلىك جانە زاڭ ۇستەمدىگى. كونستيتۋتسيا مەن زاڭداردى سوزىمەن، جازباسىمەن نەمەسە ءىس-ارەكەتىمەن بۇزعان كەز كەلگەن ادام زاڭ الدىندا جاۋاپ بەرەدى. زاڭ بارىنە ورتاق. ءبىرتۇتاس موڭعوليا – قۋاتتى موڭعوليا. بەيبىت موڭعوليا – باقىتتى موڭعوليا. تاۋەلسىز موڭعوليا – بارشامىزعا ورتاق قۇندىلىق»، – دەدى ول.
سونداي-اق پرەزيدەنت بايان-ولگەي ايماعى حالىق وكىلدەرى حۋرالىنىڭ توراعاسى ءو.بەگارىسقا ۇلى شىڭعىس حاننىڭ پورترەتىن تابىس ەتتى.
