ءۇندىستاننىڭ پاراديپ پورتىندا بورتىندا 23 تەڭىزشىسى بار MT UNITY كەمەسى ۇستالدى، دەپ حابارلايدى “ادىرنا”.
بۇل تۋرالى قازاقستاننىڭ ءسىم حابارلادى.
ەكيپاج قۇرامىندا قازاقستان رەسپۋبليكاسىنىڭ ازاماتى بار.
سىرتقى ىستەر مينيسترلىگىنىڭ رەسمي وكىلى جانبولات ۇسەنوۆتىڭ مالىمەتىنشە، كەمەنى ۇستاۋعا ونىڭ يەسىنىڭ جەرگىلىكتى جانارماي جەتكىزۋشى الدىنداعى قارجىلىق بەرەشەگى سەبەپ بولعان.
«قازاقستاندىق ديپلوماتتار ازاماتىمىزدىڭ ەلگە قايتۋىن قامتاماسىز ەتۋ ءۇشىن قاجەتتى شارالاردى قابىلداپ جاتىر»، – دەدى جانبولات ۇسەنوۆ.
ونىڭ ايتۋىنشا، جاعدايدى رەتتەۋگە جاردەم كورسەتۋ ءۇشىن ءۇندىستاننىڭ سىرتقى ىستەر مينيسترلىگىنە ءتيىستى ديپلوماتيالىق نوتا جولدانعان.
سونىمەن قاتار ءسىم اتالعان قازاقستان ازاماتى مەن ونىڭ وتباسى مۇشەلەرى قازاقستاننىڭ ديپلوماتيالىق وكىلدىكتەرىنە كومەك سۇراپ جۇگىنبەگەنىن حابارلادى.
بۇعان دەيىن باق كامەرۋن تۋى استىندا جۇزەتىن MT UNITY تانكەرىنىڭ 11 مامىردان بەرى ءۇندىستاندا ۇستالىپ تۇرعانىن حابارلاعان. كەمە جۇك ءتۇسىرۋ جۇمىستارىن اياقتاعاننان كەيىن ونىڭ يەسىنە قاتىستى قارجىلىق تالاپتارعا بايلانىستى قاماۋعا الىنعان. داۋلى ىسكە قاتىسى بار ەكى كومپانيا دا بىرىككەن اراب امىرلىكتەرىندە تىركەلگەن. قازىر ءىستى ءۇندىستاننىڭ وريسسا شتاتىنىڭ سوتى قاراپ جاتىر.
