«كىتاپ وقيتىن ۇلت» رەسپۋبليكالىق جوباسىنا قاتىسۋعا ميلليوننان استام قازاقستاندىق تىركەلدى. جوبا مەملەكەت باسشىسى قاسىم-جومارت توقاەۆتىڭ «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىعىن ورىنداۋ اياسىندا جۇزەگە اسىرىلىپ جاتىر.
قاتىسۋشىلار بايقاۋدىڭ جەتى باعىتىنىڭ ءبىرىن تاڭداي الادى. تىركەلگەننەن كەيىن ولار التى اي ىشىندە 15 كىتاپ وقىپ، ۇيىمدار، اۋداندار، قالالار مەن وڭىرلەر دەڭگەيىندە وتەتىن بىرنەشە ىرىكتەۋ كەزەڭىنەن وتەدى. وڭىرلىك كەزەڭدەگى سايىس كوماندالىق فورماتتا ۇيىمداستىرىلادى.
قر مادەنيەت جانە اقپارات ءمينيسترى ارمان قىرىقباەۆ قازاقستاندىقتاردىڭ جوباعا زور قىزىعۋشىلىق تانىتىپ وتىرعانىن اتاپ ءوتىپ، كىتاپ وقۋ مادەنيەتىن دامىتۋ بارشاعا ورتاق مىندەت ەكەنىن ايتتى. نەبارى ەكى اپتانىڭ ىشىندە ميلليوننان استام ادامنىڭ تىركەلۋى بۇل باستامانىڭ حالىق اراسىندا ۇلكەن قىزىعۋشىلىق تۋدىرعانىن كورسەتەدى.
وڭىرلىك كەزەڭنىڭ قورىتىندىسى بويىنشا ءتورت مىڭعا جۋىق قاتىسۋشى «جىل وقىرمانى» اتاعى ءۇشىن جارىستى جالعاستىرادى. وڭىرلىك ىرىكتەۋدە جۇلدەلى ورىن العان قاتىسۋشىلارعا اقشالاي سىيلىق بەرىلەدى: ءبىرىنشى ورىنعا – 600 مىڭ تەڭگە، ەكىنشى ورىنعا – 450 مىڭ تەڭگە، ءۇشىنشى ورىنعا – 300 مىڭ تەڭگە.
كەلەسى كەزەڭدە قاتىسۋشىلار ەسسە جازىپ، وقىعان شىعارمالارى بويىنشا تانىستىرىلىم جاسايدى جانە ساراپشىلار القاسىنىڭ الدىندا ءسوز سويلەيدى. وسى كەزەڭنىڭ قورىتىندىسى بويىنشا ءار وڭىردەن ون ۇزدىك وقىرمان انىقتالادى.
استانادا وتەتىن رەسپۋبليكالىق فينالعا ەلىمىزدىڭ 20 وڭىرىنەن 200 ادام قاتىسادى. ولار تەستىلەۋدەن ءوتىپ، بايقاۋ تاپسىرمالارىن ورىندايدى جانە قازىلار القاسىنىڭ الدىندا ءسوز سويلەيدى. فينال قورىتىندىسى بويىنشا قازاقستاننىڭ ۇزدىك ون وقىرمانى انىقتالادى. ولاردىڭ ارقايسىسى 10 ميلليون تەڭگە كولەمىندەگى باس جۇلدەگە يە بولادى.
