«Kıtap oqityn ūlt» respublikalyq jobasyna qatysuǧa millionnan astam qazaqstandyq tırkeldı. Joba Memleket basşysy Qasym-Jomart Toqaevtyŋ «Kıtap oqu mädenietın damytu jäne zerdelı ūlt qalyptastyru jönındegı şaralar turaly» Jarlyǧyn oryndau aiasynda jüzege asyrylyp jatyr.
Qatysuşylar baiqaudyŋ jetı baǧytynyŋ bırın taŋdai alady. Tırkelgennen keiın olar alty ai ışınde 15 kıtap oqyp, ūiymdar, audandar, qalalar men öŋırler deŋgeiınde ötetın bırneşe ırıkteu kezeŋınen ötedı. Öŋırlık kezeŋdegı saiys komandalyq formatta ūiymdastyrylady.
QR Mädeniet jäne aqparat ministrı Arman Qyryqbaev qazaqstandyqtardyŋ jobaǧa zor qyzyǧuşylyq tanytyp otyrǧanyn atap ötıp, kıtap oqu mädenietın damytu barşaǧa ortaq mındet ekenın aitty. Nebärı ekı aptanyŋ ışınde millionnan astam adamnyŋ tırkeluı būl bastamanyŋ halyq arasynda ülken qyzyǧuşylyq tudyrǧanyn körsetedı.
Öŋırlık kezeŋnıŋ qorytyndysy boiynşa tört myŋǧa juyq qatysuşy «Jyl oqyrmany» ataǧy üşın jarysty jalǧastyrady. Öŋırlık ırıkteude jüldelı oryn alǧan qatysuşylarǧa aqşalai syilyq berıledı: bırınşı orynǧa – 600 myŋ teŋge, ekınşı orynǧa – 450 myŋ teŋge, üşınşı orynǧa – 300 myŋ teŋge.
Kelesı kezeŋde qatysuşylar esse jazyp, oqyǧan şyǧarmalary boiynşa tanystyrylym jasaidy jäne sarapşylar alqasynyŋ aldynda söz söileidı. Osy kezeŋnıŋ qorytyndysy boiynşa är öŋırden on üzdık oqyrman anyqtalady.
Astanada ötetın respublikalyq finalǧa elımızdıŋ 20 öŋırınen 200 adam qatysady. Olar testıleuden ötıp, baiqau tapsyrmalaryn oryndaidy jäne qazylar alqasynyŋ aldynda söz söileidı. Final qorytyndysy boiynşa Qazaqstannyŋ üzdık on oqyrmany anyqtalady. Olardyŋ ärqaisysy 10 million teŋge kölemındegı bas jüldege ie bolady.
