فوتو:تۋريزم جانە سپورت مينيسترلىگى
قازاقستاندىق ۆەلوشاباندوز ريناتا سۇلتانوۆا جاپونيادا ءوتىپ جاتقان XX جازعى ازيا ويىندارىندا التىن مەدال جەڭىپ الدى. ول ايەلدەر اراسىنداعى تاسجولداعى ۆەلوسپورتتان جەكە جارىستا توپ جارىپ، قازاقستان قۇراماسىنا العاشقى التىن جۇلدەنى سىيلادى. بۇل تۋرالى 20 قىركۇيەك كۇنى قر تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
«ريناتا سۇلتانوۆا جارىستىڭ العاشقى كۇنىندە جەڭىسكە جەتىپ، ۇلتتىق قۇرامانىڭ التىن جۇلدە ەسەبىن اشتى»، – دەلىنگەن حابارلامادا.
سپورتشى قاشىقتىقتى 36 مينۋت 23,72 سەكۋندتا باعىندىردى. وسى ناتيجەسىمەن ول ازيا ويىندارىنىڭ جەڭىمپازى اتاندى.
كۇمىس مەدال قىتاي سپورتشىسى چجان حاوعا بۇيىردى. ول جارىستى 36 مينۋت 28,40 سەكۋندتا اياقتادى. ال وڭتۇستىك كورەيا وكىلى سين دجيىن 36 مينۋت 56,14 سەكۋند ناتيجەسىمەن قولا جۇلدەگە يە بولدى.
ريناتا سۇلتانوۆانىڭ جەڭىسى قازاقستان قۇراماسىنىڭ XX جازعى ازيا ويىندارىنداعى التىن مەدال ەسەبىن اشتى.
ايتا كەتەيىك، بۇعان دەيىن قازاقستان قۇراماسى ايچي-ناگويادا ءوتىپ جاتقان ازيا ويىندارىندا العاشقى مەدالىن جەڭىپ العان ەدى. ارلان جاناباي ەرلەر اراسىنداعى ترياتلوننان جەكە جارىستا قولا جۇلدەگە يە بولدى.
وسىلايشا، جارىستىڭ العاشقى كۇنىندە قازاقستان سپورتشىلارىنىڭ قورجىنىنا التىن جانە قولا مەدال ءتۇستى.
