پرەزيدەنت، قاۋىپسىزدىك كەڭەسىنىڭ توراعاسى قاسىم-جومارت توقاەۆ دەربەس مەملەكەتتىك ورگان رەتىندە قۇرىلعان قاۋىپسىزدىك كەڭەسى اپپاراتىنىڭ العاشقى كەڭەسىن وتكىزدى. بۇل تۋرالى بۇگىن، 23 قىركۇيەكتە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مەملەكەت باسشىسى اپپاراتتىڭ جاڭا مارتەبەسىن مەملەكەتتىك ينستيتۋتتاردى رەفورمالاۋ ۇدەرىسىمەن ساباقتاستىرا قاراستىرۋ قاجەت ەكەنىن اتاپ ءوتتى.
«الەمدىك احۋال جەدەل قۇبىلىپ جاتقان كەزەڭدە قاۋىپسىزدىك كەڭەسى اسا ماڭىزدى ماسەلەلەر بويىنشا ناقتى ءارى جان-جاقتى سارالانعان شەشىمدەر قابىلدايتىن ورتالىققا اينالۋى ءتيىس»،– دەلىنگەن حابارلامادا.
قاسىم-جومارت توقاەۆ قازىرگى سىن-قاتەرلەردىڭ سيپاتى ەداۋىر وزگەرگەنىنە نازار اۋداردى. وسى ورايدا كيبەرقاۋىپسىزدىكتى قامتاماسىز ەتۋگە جانە جاساندى ينتەللەكتىنى قولدانۋعا باسا ءمان بەرىلدى.
قاۋىپسىزدىك كەڭەسىنىڭ توراعاسى الداعى ۋاقىتتا وزەكتىلىگى ارتا تۇسەتىن اقپارات، تەحنولوگيا، ازىق-تۇلىك، سۋ جانە ەنەرگەتيكا قاۋىپسىزدىگى ماسەلەلەرىنە ەرەكشە توقتالدى. پرەزيدەنت اتالعان سالالارداعى باسىمدىقتاردى بەلگىلەپ، «زاڭ مەن ءتارتىپ» قاعيداتىن نەگىزگى باعدار رەتىندە اتادى.
كەڭەس قورىتىندىسى بويىنشا اپپاراتقا بىرقاتار ناقتى مىندەت جۇكتەلدى. اتاپ ايتقاندا، قازاقستاننىڭ ۇلتتىق مۇددەسىن، ەگەمەندىگى مەن تۇراقتىلىعىن قورعاۋ قاۋىپسىزدىك كەڭەسى جۇمىسىنىڭ تيىمدىلىگىن ايقىندايتىن باستى ولشەم بولۋى ءتيىس.
بۇعان دەيىن قوس پالاتالى پارلامەنتتە ءماجىلىس توراعاسى بولعان ەرلان قوشانوۆتىڭ قازاقستان حالىق كەڭەسىنىڭ توراعاسى بولىپ سايلانعانىن جازعان ەدىك.
