ازەربايجاننىڭ قورعانىس ءمينيسترى، گەنەرال-پولكوۆنيك زاكير گاسانوۆ كاسپي تەڭىزىندەگى اسكەري وقۋ-جاتتىعۋ كەزىندە اسكەري قىزمەتكەرلەردىڭ قازا بولۋىنا جانە جاراقات الۋىنا بايلانىستى قازاقستاننىڭ قورعانىس ءمينيسترى، گەنەرال-لەيتەنانت داۋرەن قوسانوۆقا كوڭىل ايتتى، دەپ حابارلايدى "ادىرنا".
بۇل تۋرالى ازەربايجان قورعانىس مينيسترلىگى حابارلادى.
زاكير گاسانوۆ قازا تاپقان اسكەري قىزمەتكەرلەردىڭ تۋعان-تۋىستارى مەن جاقىندارىنا كوڭىل ايتىپ، جارالانعان اسكەري قىزمەتشىنىڭ تەزىرەك ساۋىعىپ كەتۋىن تىلەدى. سونداي-اق ىزدەستىرۋ-قۇتقارۋ جۇمىستارىنىڭ وڭ ناتيجەمەن اياقتالۋىنا ءۇمىت ءبىلدىردى.
بۇعان قوسا، ازەربايجاننىڭ سىرتقى ىستەر مينيسترلىگى الەۋمەتتىك جەلىدەگى رەسمي پاراقشاسىندا قازاقستانعا كوڭىل ايتتى.
ۆەدومستۆو قازا تاپقان اسكەري قىزمەتكەرلەردىڭ وتباسىلارى مەن جاقىندارىنا، سونداي-اق قازاقستان حالقى مەن ۇكىمەتىنە قايعىرىپ كوڭىل ءبىلدىرىپ، حابار-وشارسىز كەتكەن اسكەري قىزمەتشىلەردىڭ امان-ەسەن تابىلۋىنا تىلەكتەستىك ءبىلدىردى.
سونداي-اق جارالانعان اسكەري قىزمەتكەردىڭ تەزىرەك ساۋىعىپ كەتۋىن تىلەدى.
