سىمبات تورەتاەۆ جاڭاوزەن قالاسىنىڭ اكىمى بولىپ تاعايىندالدى، دەپ حابارلايدى "ادىرنا" ءتىلشىسى.
ءتيىستى وكىمگە ماڭعىستاۋ وبلىسىنىڭ اكىمى نۇرداۋلەت قيلىباي قول قويدى.
بۇعان دەيىن سىمبات تورەتاەۆ قاراقيا اۋدانىنىڭ اكىمى قىزمەتىن اتقارعان. ول بۇل لاۋازىمعا 2023 جىلعى 19 مامىردا تاعايىندالعان.
سىمبات تورەتاەۆ 1978 جىلعى 27 قاڭتاردا ماڭعىستاۋ وبلىسىنىڭ جەتىباي اۋىلىندا دۇنيەگە كەلگەن. ش. ەسەنوۆ اتىنداعى اقتاۋ ۋنيۆەرسيتەتىن «ەكونوميكا جانە مەنەدجمەنت» ماماندىعى بويىنشا، الماتى مەنەدجمەنت ۋنيۆەرسيتەتىن «ىسكەرلىك اكىمشىلەندىرۋ» ماماندىعى بويىنشا تامامداعان.
ەڭبەك جولىن 2000 جىلى ماڭعىستاۋ وبلىسىنىڭ ىشكى ىستەر ورگاندارىندا باستاعان. جەدەل ۋاكىل جانە اسا ماڭىزدى ىستەر جونىندەگى اعا جەدەل ۋاكىل قىزمەتتەرىن اتقارعان.
2006–2010 جىلدارى كوممەرتسيالىق قۇرىلىمداردا باسشىلىق قىزمەتتەردە جۇمىس ىستەگەن. 2010–2014 جىلدارى قاراقيا اۋدانى مۇنايشى اۋىلىنىڭ اكىمى بولدى. 2015–2019 جىلدارى ماڭعىستاۋ وبلىسى اكىمى اپپاراتىنىڭ قۇقىق قورعاۋ ورگاندارىمەن جۇمىس جانە تەرروريزمگە قارسى ءىس-قيمىل ءبولىمىن باسقاردى. 2019 جىلعى قىركۇيەكتەن 2023 جىلعى اقپانعا دەيىن قاراقيا اۋدانى اكىمىنىڭ ورىنباسارى قىزمەتىن اتقاردى. 2023 جىلدان بەرى قاراقيا اۋدانىنىڭ اكىمى بولدى.
جاڭاوزەن قالاسىنىڭ اكىمى قىزمەتىن بۇعان دەيىن جانسەيت قاينارباەۆ اتقارعان.
