قازاقستان شاحمات فەدەراتسياسىنىڭ پرەزيدەنتى تيمۋر تۇرلوۆ حالىقارالىق شاحمات فەدەراتسياسىنىڭ (FIDE) پرەزيدەنتى بولىپ سايلاندى، دەپ حابارلايدى "ادىرنا" ءتىلشىسى.
سايلاۋ 26 قىركۇيەكتە وزبەكستاننىڭ سامارقاند قالاسىندا ۇيىمنىڭ باس اسسامبلەياسى اياسىندا ءوتتى.
داۋىس بەرۋدىڭ ەكىنشى كەزەڭىندە تيمۋر تۇرلوۆ 196 داۋىستىڭ 110-ىن جيناپ، جەڭىسكە جەتتى.
FIDE پرەزيدەنتى ءتورت جىل مەرزىمگە سايلانادى. داۋىس بەرۋگە ۇيىمعا مۇشە ۇلتتىق شاحمات فەدەراتسيالارى قاتىسادى. ءار فەدەراتسيانىڭ ءبىر داۋىسى بار. سايلاۋ جاسىرىن داۋىس بەرۋ ارقىلى وتكىزىلەدى.
تيمۋر تۇرلوۆ سايلاۋالدى ناۋقانىندا FIDE قىزمەتىن دامىتۋعا باعىتتالعان باعدارلاماسىن تانىستىرعان. ونىڭ باستامالارى قاتارىندا دامۋ قورىن قۇرۋ، حالىقارالىق شاحماتتى قارجىلاندىرۋدى ارتتىرۋ، ۇيىمدى تسيفرلاندىرۋ، ماركەتينگ جانە كوممۋنيكاتسيا باعىتتارىن كۇشەيتۋ، سونداي-اق ۇلتتىق شاحمات فەدەراتسيالارىن قولداۋ بار.
تيمۋر تۇرلوۆ بۇعان دەيىن FIDE-ءنى تسيفرلاندىرۋعا جانە ۇيىمنىڭ حالىقارالىق دەڭگەيدەگى ىقپالىن ارتتىرۋعا باسىمدىق بەرەتىنىن ايتتى.
سايلاۋدا تيمۋر تۇرلوۆپەن بىرگە گەرمانيالىق كاسىپكەر يان حەنريك بيۋتتنەر مەن ۆاديم روزەنشتەين دە پرەزيدەنتتىككە ۇمىتكەر بولدى. تۋرلوۆتىڭ سايلاۋالدى تىزىمىندە FIDE پرەزيدەنتىنىڭ ورىنباسارى رەتىندە ۆيشۆاناتان اناند كورسەتىلدى.
ايتا كەتەيىك، FIDE پرەزيدەنتىنىڭ مىندەتىن ۋاقىتشا ۆيشۆاناتان اناند اتقارىپ كەلگەن. ول بۇل قىزمەتكە 2026 جىلعى شىلدەدە كىرىسكەن.
