فوتو: قورعانىس مينيسترلىگى
قورعانىس ءمينيسترى، گەنەرال-مايور ايدوس مىرزاحمەتوۆ ۆەدومستۆونىڭ باسشىلىق قۇرامىمەن العاشقى جۇمىس كەڭەسىن وتكىزدى. جيىندا قارۋلى كۇشتەردى ودان ءارى دامىتۋ جانە رەفورمالاۋ بويىنشا نەگىزگى مىندەتتەر تالقىلاندى، دەپ حابارلايدى "ادىرنا".
كەزدەسۋدە مەملەكەت باسشىسى، قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى جۇكتەگەن ارميانى كەشەندى جاڭعىرتۋ جونىندەگى تاپسىرمالاردى ورىنداۋعا باسىمدىق بەرىلدى. اسكەري رەفورمالار كەزىندە قازىرگى قاۋىپ-قاتەرلەر، قارۋلى قاقتىعىستاردىڭ تاجىريبەسى، اسكەري تەحنولوگيالاردىڭ دامۋى جانە اسكەري قىزمەتشىلەردىڭ قاۋىپسىزدىگى ەسكەرىلمەك.
ءمينيستردىڭ ايتۋىنشا، نەگىزگى مىندەتتەردىڭ قاتارىندا اسكەرلەردىڭ ناقتى جاۋىنگەرلىك ازىرلىگىن ارتتىرۋ، باسقارۋ جۇيەسىن جەتىلدىرۋ، جاۋىنگەرلىك دايارلىق ساپاسىن كوتەرۋ، سونداي-اق قارۋ-جاراق پەن اسكەري تەحنيكانى جاڭعىرتۋ بار.
اسكەري قىزمەتشىلەردىڭ مورالدىق-پسيحولوگيالىق جاعدايىنا دا ەرەكشە ءمان بەرىلدى. كومانديرلەرگە اسكەري ۇجىمداردا قولايلى احۋال قالىپتاستىرۋ، تاربيە جۇمىسىنىڭ تيىمدىلىگىن ارتتىرۋ جانە جەكە قۇرامنىڭ قىزمەت ەتۋ جاعدايلارىن جاقسارتۋ تاپسىرىلدى. سونىمەن قاتار جارعىعا جات قارىم-قاتىناستاردىڭ الدىن الۋ جانە اسكەري قىزمەت قاۋىپسىزدىگىن قامتاماسىز ەتۋ ماسەلەلەرى نازاردا بولادى.
ايدوس مىرزاحمەتوۆ اسكەري قىزمەتشىلەردى دايارلاۋ جۇيەسىن قازىرگى زامانعى سوعىس جاعدايىنا بەيىمدەۋ قاجەتتىگىن اتاپ ءوتتى. وقۋ-جاتتىعۋلار پراكتيكالىق تاجىريبەگە جانە زاماناۋي قارۋلى قاقتىعىستاردىڭ ساباقتارىن تالداۋعا نەگىزدەلۋى ءتيىس.
بۇل رەتتە ۇشقىشسىز ۇشۋ جۇيەلەرى، راديوەلەكتروندىق كۇرەس قۇرالدارى، بارلاۋ جانە بايلانىس جۇيەلەرى سەكىلدى زاماناۋي تەحنولوگيالاردى قولدانۋعا باسىمدىق بەرىلمەك.
اسكەري بولىمدەردىڭ جاۋىنگەرلىك مىندەتتەردى ورىنداۋعا ازىرلىگى دە باستى نازاردا. كومانديرلەرگە جەكە قۇرامنىڭ كاسىبي دايارلىعىن قامتاماسىز ەتۋ، بولىمشەلەردىڭ ۇيلەسىمدى ارەكەتىن قالىپتاستىرۋ جانە ءتۇرلى جاعدايدا جەدەل قيمىلداۋعا تۇراقتى ازىرلىكتى ساقتاۋ مىندەتى قويىلدى.
رەفورمانىڭ تاعى ءبىر باعىتى – قارۋلى كۇشتەردى باسقارۋ جۇيەسىن جەتىلدىرۋ. بۇل باعىتتا تسيفرلاندىرۋدى جالعاستىرۋ، ارتىق اكىمشىلىك راسىمدەر مەن ەسەپتىلىكتى قىسقارتۋ جوسپارلانىپ وتىر.
ءمينيستردىڭ تاپسىرماسىنا سايكەس، بوساتىلعان رەسۋرستار اسكەرلەردىڭ جاۋىنگەرلىك قابىلەتىن ارتتىرۋعا باعىتتالۋى كەرەك.
ماتەريالدىق-تەحنيكالىق قامتاماسىز ەتۋ ماسەلەسى دە نازاردان تىس قالمايدى. قارۋ-جاراق پەن قاجەتتى رەسۋرستاردى ساتىپ الۋ كەزىندە اسكەرلەردىڭ ناقتى قاجەتتىلىكتەرى مەن جاۋىنگەرلىك دايارلىقتىڭ باسىم باعىتتارى ەسكەرىلمەك. سونىمەن بىرگە بيۋدجەت قاراجاتىن ءتيىمدى پايدالانۋ جانە ءتيىمسىز شىعىندارعا جول بەرمەۋ تاپسىرىلدى.
«ارميا ەسەپتىك كورسەتكىشتەر مەن كوزبوياۋشىلىق ءىس-شارالار ءۇشىن ەمەس، ناقتى ناتيجەگە قول جەتكىزۋ ءۇشىن دامۋى كەرەك»، – دەدى قورعانىس ءمينيسترى.
جۇمىس كەڭەسىندە مەملەكەت باسشىسىنىڭ تاپسىرماسىمەن قورعانىس مينيسترلىگىنىڭ قىزمەتىنە جۇرگىزىلىپ جاتقان كەشەندى تەكسەرۋدىڭ بارىسى دا قارالدى. قۇرىلىمدىق بولىمشەلەردىڭ باسشىلارىنا كوميسسيا جۇمىسىنا قاجەتتى قولداۋ كورسەتىپ، سۇراتىلعان اقپاراتتى تولىق ۇسىنۋ تاپسىرىلدى.
ەسكە سالايىق، 2026 جىلعى 24 قىركۇيەكتە كاسپي تەڭىزىندەگى اسكەري وقۋ-جاتتىعۋ كەزىندە اسكەري قىزمەتشىلەر قازا تاپقانى حابارلانعان بولاتىن. كەيىن ىزدەستىرۋ-قۇتقارۋ جۇمىستارى بارىسىندا قازا بولعانداردىڭ سانى 14 ادامعا جەتتى.
وقيعادان كەيىن مەملەكەت باسشىسىنىڭ تاپسىرماسىمەن قورعانىس مينيسترلىگىنىڭ قىزمەتىن تەكسەرۋ جونىندەگى كوميسسيا قۇرىلدى. كوميسسيا العاشقى ناتيجەلەرى تۋرالى جەتى كۇن ىشىندە بايانداۋى ءتيىس.
وقيعاعا بايلانىستى قارۋلى كۇشتەردىڭ جوعارى جانە اعا كوماندالىق قۇرامىنداعى بىرقاتار جاۋاپتى لاۋازىمدى تۇلعا ۇستالدى. ولارعا قىزمەتكە سالعىرت قاراۋ جانە اۋىر زارداپتارعا اكەپ سوققان كورابل جۇرگىزۋ قاعيدالارىن بۇزۋ بويىنشا قىلمىستىق قۇقىق بۇزۋشىلىق جاسادى دەگەن كۇدىك كەلتىرىلدى.
26 قىركۇيەكتە ماڭعىستاۋ وبلىسىندا كاسپيدەگى وقيعا كەزىندە قازا تاپقان اسكەري قىزمەتشىلەر جەر قوينىنا تاپسىرىلدى.
وسى جاعدايدان كەيىن داۋرەن قوسانوۆ قورعانىس ءمينيسترى قىزمەتىنەن بوساتىلىپ، ونىڭ ورنىنا ايدوس مىرزاحمەتوۆ تاعايىندالدى. مەملەكەت باسشىسى جاڭا مينيسترگە اسكەري باسقارۋ جۇيەسىن جەتىلدىرۋدى جانە قارۋلى كۇشتەردىڭ جاۋىنگەرلىك قابىلەتىن ارتتىرۋعا باعىتتالعان جۇمىستى كۇشەيتۋدى تاپسىردى.
