استانادا قىزمەتكە سالعىرت قاراۋ دەرەگى بويىنشا ءتورت بۇرىنعى پوليتسيا قىزمەتكەرى ۇستالدى، دەپ حابارلايدى "ادىرنا" ءتىلشىسى.
بۇعان ەلوردادا ايەلدىڭ قاتىگەزدىكپەن ولتىرىلۋىنە بايلانىستى جۇرگىزىلگەن قىزمەتتىك تەكسەرۋ سەبەپ بولدى.
قازاقستان رەسپۋبليكاسى ءىىم مالىمەتىنشە، ءىىم وزىندىك قاۋىپسىزدىك دەپارتامەنتى جاۋاپتى لاۋازىمدى تۇلعالاردىڭ ارەكەتتەرىنە قىزمەتتىك تەكسەرۋ جۇرگىزگەن.
تەكسەرۋ قورىتىندىسى بويىنشا ءتورت پوليتسيا قىزمەتكەرى تەرىس سەبەپتەرمەن قىزمەتتەن بوساتىلدى. ولاردىڭ قاتارىندا ەكى اۋداندىق پوليتسيا باسقارماسىنىڭ باستىعى مەن ورىنباسارلارى، سونداي-اق استانا قالاسى پوليتسيا دەپارتامەنتى باستىعىنىڭ ورىنباسارى بار.
پوليتسيا دەپارتامەنتىنىڭ باستىعى مەن تاعى ءبىر ورىنباسارى قاتاڭ تارتىپتىك جاۋاپكەرشىلىككە تارتىلدى.
سونىمەن قاتار قىزمەتكە سالعىرت قاراۋ فاكتىسى بويىنشا قىلمىستىق ءىس قوزعالدى. تەرگەۋ اياسىندا بۇرىن قىزمەت اتقارعان ءتورت پوليتسيا قىزمەتكەرى ۇستالدى.
قازىر تەرگەۋ امالدارى جالعاسىپ جاتىر. ءىس ىشكى ىستەر ءمينيسترىنىڭ ەرەكشە باقىلاۋىنا الىنعان.
