شىمكەنتتە تىلەنشين كوشەسىندەگى تەمىرجولدىڭ ۇستىنەن سالىنعان جاڭا اۆتوكولىك وتكەلى تەحنيكالىق تۇرعىدا اشىلىپ، اۆتوكولىكتەردىڭ قوزعالىسى ىسكە قوسىلدى. ءىس-شاراعا قالا اكىمى عابيت سىزدىقبەكوۆ، بۇقارالىق اقپارات قۇرالدارىنىڭ وكىلدەرى جانە جاقىن ماڭداعى ەلدىمەكەندەردىڭ تۇرعىندارى قاتىستى.
ايتا كەتەيىك، مەملەكەت باسشىسىنىڭ شىمكەنت قالاسىنىڭ كولىك ينفراقۇرىلىمىن ودان ءارى دامىتۋ جونىندەگى تاپسىرمالارىن ورىنداۋ ماقساتىندا مومىنوۆ جانە تىلەنشين كوشەلەرىندەگى وتكەلدەردىڭ نەگىزگى قۇرىلىسى وتكەن جىلى باستالعان. جوبالار قالانىڭ اۋداندارى اراسىنداعى بايلانىستى كۇشەيتۋگە، كولىك قاتىناسىن جاقسارتۋعا جانە قوزعالىسقا قاۋىپسىز جاعداي جاساۋعا باعىتتالعان.
وتكەل تەمىرجولداعى پويىز قوزعالىسىنىڭ جوعارى قارقىندىلىعىنا بايلانىستى ەرەكشە ماڭىزدى. بۇل ۋچاسكە ارقىلى تاۋلىگىنە ورتا ەسەپپەن 59 پويىز وتەدى. سونىڭ سالدارىنان تەمىرجول وتكەلى 10-20 مينۋتقا جابىلىپ، كولىك كەپتەلىسىن تۋىنداتىپ، جول ءجۇرۋ ۋاقىتىن ۇلعايتاتىن.
جاڭا نىسان اۆتوموبيل جانە تەمىرجول قوزعالىسىن ءبىر-بىرىنەن ءبولىپ، كولىكتىڭ ۇزدىكسىز قوزعالىسىن قامتاماسىز ەتەدى.
جاڭا جول وتكەلى – بيىل پايدالانۋعا بەرىلگەن ەكىنشى نىسان. قاڭتار ايىندا مومىنوۆ كوشەسىندەگى اۆتوكولىك وتكەلى اشىلعان بولاتىن. ەكى نىسان دا اۆتوكولىك جولى جانە تەمىرجول جەلىسىنىڭ قيىلىسىنداعى كولىك قاتىناسىن جاقسارتۋعا جانە قوزعالىس قاۋىپسىزدىگىن ارتتىرۋعا باعىتتالعان.
قالا اكىمى عابيت سىزدىقبەكوۆتىڭ ايتۋىنشا، كولىك ينفراقۇرىلىمىن دامىتۋ شىمكەنتتىڭ دامۋ قارقىنىنا ساي جۇرگىزىلىپ، قالانىڭ ءار اۋدانىنداعى تۇرعىنداردىڭ قاجەتتىلىكتەرىن ەسكەرۋى ءتيىس.
تىلەنشين كوشەسىندەگى جول وتكەلى اشىلعاننان كەيىن ونىڭ اينالاسىنداعى اۋماقتى اباتتاندىرۋ جۇمىسى جالعاسادى. جول وتكەلىنىڭ ىسكە قوسىلۋى ىرگەلەس كوشەلەردەگى قوزعالىس جاعدايىن جاقسارتۋعا، تەمىرجولدان وتۋدەگى قاۋىپسىزدىكتى ارتتىرۋعا جانە قالا تۇرعىندارىنىڭ جول ءجۇرۋ ۋاقىتىن قىسقارتۋعا مۇمكىندىك بەرەدى.
شىمكەنت قالاسى اكىمىنىڭ ءباسپاسوز قىزمەتى
