فوتو: NARENDRA MODI
ءباا-دەن تەل-اۆيۆكە ۇشىپ بارا جاتقان Flydubai ۇشاعىندا بولعان وقيعا كەزىندە اۋىر جارالانعان ۇندىستاندىق ۇشقىش سميت ماچچحار وقيعانىڭ ءمان-جايىن ايتىپ بەردى. بۇل تۋرالى ۆۆس جازدى، دەپ حابارلايدى “ادىرنا”.
ءۇندىستان پرەمەر-ءمينيسترى نارەندرا موديمەن ۆيدەوبايلانىس كەزىندە اۋە كەمەسىنىڭ كومانديرى ماچچحار ەكىنشى ۇشقىشتىڭ وزىنە شابۋىلىن جالعاستىرعان كەزدە ەدەندە جاتقانىن ايتتى. سول ۋاقىتتا ول ۇشاقتىڭ بيىكتىگىن تەز جوعالتىپ جاتقانىن ءتۇسىنىپ، ءبىر ارەكەت جاساۋ قاجەت ەكەنىن ۇققان.
«مەن جارالانىپ، ەدەندە جاتتىم. بىراق وزىمە سوڭعى كۇشىمدى جيناپ، ەسىكتى ىشتەن اشۋىم كەرەك دەدىم. وزگە ادامدار كابيناعا كىرىپ، جاعدايدى باقىلاۋعا الۋعا كومەكتەسۋى قاجەت بولدى. ارينە، مەن ءوز ءومىرىم ءۇشىن كۇرەستىم، بىراق باسقا ادامداردىڭ قازا بولۋىنا جول بەرە المادىم»، - دەدى ول.
كابيناعا كىرگەن جولاۋشىلار شابۋىل جاساعان ەكىنشى ۇشقىشتى زالالسىزداندىرعان. كەيىن جولاۋشىلار مەن بورتتاعى باسقا ۇشقىشتىڭ كومەگىمەن ۇشاق تۇراقتاندىرىلىپ، ساۋد ارابياسىنىڭ تابۋك قالاسىنداعى اۋەجايعا قوندىرىلعان.
ماچچحار كوپ قان جوعالتىپ، الدىمەن تابۋك اۋرۋحاناسىنا جەتكىزىلگەن. كەيىن سانيتارلىق اۆياتسيامەن ابۋ-دابيگە جونەلتىلگەن. ءۇندىستاننىڭ ءباا-دەگى ەلشىلىگى ونىڭ جاعدايى جاقسارىپ، قالپىنا كەلىپ جاتقانىن حابارلادى.
ءۇندىستان پرەمەر-ءمينيسترى نارەندرا مودي ۇشقىشتىڭ باتىلدىعى مەن جىلدام شەشىم قابىلداۋى كوپتەگەن ادامنىڭ ءومىرىن ساقتاپ قالعانىن ايتتى.
يزرايل بيلىگى وقيعانى ۇشاقتى اپاتقا ۇشىراتۋ ماقساتىنداعى باسىپ الۋ ارەكەتى دەپ باعالاعان. شابۋىل جاساعان ادام ومان ازاماتى ەكەنى انىقتالعان، ول قازىر تەرگەۋدە.
سميت ماچچحار — Boeing 737 ۇشاعىنىڭ تاجىريبەلى كومانديرى. ونىڭ 15 جىلعا جۋىق اۆياتسياداعى ەڭبەك ءوتىلى جانە 9 750 ساعاتتان استام ۇشۋ تاجىريبەسى بار. 2022 جىلدان بەرى Flydubai كومپانياسىندا جۇمىس ىستەيدى.
ەسكە سالساق، وقيعا 30 قىركۇيەك كۇنى تاڭەرتەڭ تىركەلگەن. ۇشاق كابيناسىندا بولعان وقيعادان كەيىن ەكيپاج توتەنشە جاعداي تۋرالى بەلگى بەرىپ، ساۋد ارابياسىنداعى تابۋك اۋەجايىنا شۇعىل قونعان. بورتتاعى جولاۋشىلاردىڭ بارلىعى امان-ەسەن ءتۇسىرىلىپ، سول كۇنى كەشكە Flydubai-دىڭ باسقا رەيسىمەن يزرايلگە جەتكىزىلگەن.
يزرايل بيلىگى مەن جولاۋشىلاردىڭ حابارلاۋىنشا، ەكىنشى ۇشقىش اۋە كەمەسىنىڭ كومانديرىنە پىشاق سۇققان. وسىدان كەيىن ۇشاق كۇرت تومەندەي باستاعان. سول كەزدە جولاۋشىلار شابۋىل جاساعان ۇشقىشتى ۇستاپ، ونى زالالسىزداندىرعان.
اۋە كومپانياسىنىڭ حابارلاۋىنشا، ۇشاقتى بورتتا جولاۋشى رەتىندە وتىرعان، كەزەكشىلىكتە بولماعان Flydubai ۇشقىشتارى قاۋىپسىز جەرگە قوندىرعان.
وقيعانىڭ ءمان-جايى ازىرگە تەرگەرىلىپ جاتىر. اۋە كومپانياسى تەرگەۋ اياقتالعانشا، اسىعىس شەشىم جاساماۋعا شاقىردى.
