فوتو: اقوردا
مەملەكەت باسشىسى قاسىم-جومارت توقاەۆقا قورعانىس مينيسترلىگىندەگى جاعدايدى كەشەندى تەكسەرۋ جونىندەگى كوميسسيانىڭ العاشقى قورىتىندىلارى باياندالدى. بۇل تۋرالى اقوردا جازدى، دەپ حابارلايدى "ادىرنا".
پرەزيدەنت كوميسسيا مۇشەلەرىمەن كەزدەسىپ، اتقارىلعان جۇمىستىڭ العاشقى ناتيجەلەرىن تىڭدادى. كوميسسيا توراعاسى، قاۋىپسىزدىك كەڭەسى توراعاسىنىڭ ورىنباسارى ايدا بالاەۆا تەكسەرىستىڭ نەگىزگى باعىتتارى بويىنشا ەسەپ بەردى.
جيىندا ماڭعىستاۋ وبلىسىندا بولعان قايعىلى وقيعا قارۋلى كۇشتەردەگى بىرقاتار جۇيەلى ماسەلەنىڭ بارىن كورسەتكەنى ايتىلدى. الدىن الا تەرگەۋ دەرەكتەرى بويىنشا، اسكەري ءىس-شارالاردى ۇيىمداستىرۋ جانە جوسپارلاۋ كەزىندە ەلەۋلى قاتەلىكتەرگە جول بەرىلگەن. سونىمەن بىرگە بۇعان دەيىنگى باسشىلىق تاراپىنان ءتيىستى باقىلاۋ بولماعانى انىقتالعان.
پرەزيدەنت العاشقى كادرلىق شەشىمدەر قابىلدانعانىن اتاپ ءوتتى. الايدا اسكەري قىزمەتشىلەردىڭ قازاسىنا كىنالى بارلىق لاۋازىمدى تۇلعا زاڭ اياسىندا جاۋاپقا تارتىلۋى كەرەك ەكەنىن ايتتى. بۇل ماسەلە مەملەكەت باسشىسىنىڭ جەكە باقىلاۋىندا بولماق.
تەكسەرىستىڭ العاشقى كەزەڭى بويىنشا قۇقىق قورعاۋ ورگاندارى قورعانىس مينيسترلىگىنە قاتىستى 13 قىلمىستىق ءىس قوزعاعان. ولار مەملەكەت مۇلكىن تالان-تاراجعا سالۋ، قىزمەتتىك وكىلەتتىكتى اسىرا پايدالانۋ جانە مينيسترلىككە قاراستى ۇيىمدار مەن بولىمشەلەردەگى وزگە دە زاڭ بۇزۋشىلىقتارعا بايلانىستى.
ماڭعىستاۋداعى قايعىلى وقيعانى زەردەلەۋ بارىسىندا وقۋ-جاتتىعۋلاردى جوسپارلاۋ، تاۋەكەلدەردى باعالاۋ، دەسانت ءتۇسىرۋدى ۇيىمداستىرۋ جانە اسكەري قىزمەتشىلەردىڭ قاۋىپسىزدىگىن قامتاماسىز ەتۋ كەزىندە بىرقاتار ەلەۋلى كەمشىلىك بولعانى انىقتالعان.
قولباسشىلىق قۇرامنىڭ سالعىرتتىعىنا قاتىستى تەرگەۋ جالعاسىپ جاتىر. قازىر بەس لاۋازىمدى تۇلعا قاماۋعا الىنعان. تەرگەۋ اياقتالعاننان كەيىن ولاردىڭ ارەكەتىنە قۇقىقتىق باعا بەرىلمەك.
سونىمەن قاتار اسكەري ءتارتىپ پەن جەكە قۇرام اراسىندا الدىن الۋ جۇمىستارىنىڭ دەڭگەيىندە دە كەمشىلىكتەر بارى انىقتالدى. اسكەريلەرگە الىمجەتتىك جاساۋ جانە جارعى تالاپتارىن بۇزۋ فاكتىلەرى بويىنشا قىلمىستىق ىستەر قوزعالعان.
تەكسەرۋ بارىسىندا اسكەري قاۋىپسىزدىك تالاپتارىن ساقتاۋ، اسكەري قىزمەت وتكەرۋ جاعدايلارى، تىلدىق قامتاماسىز ەتۋ جانە جەكە قۇراممەن تاربيە جۇمىسىن جۇرگىزۋ ماسەلەلەرىنە ەرەكشە نازار اۋدارىلعان.
قاسىم-جومارت توقاەۆ كوميسسياعا قورعانىس مينيسترلىگىنىڭ جاڭا باسشىلىعىمەن بىرلەسىپ، انىقتالعان كەمشىلىكتەردى جويۋ بويىنشا ناقتى ۇسىنىستار ازىرلەۋدى تاپسىردى. تەكسەرۋ ناتيجەلەرى قارۋلى كۇشتەردى رەفورمالاۋ جوسپارىن ازىرلەۋ كەزىندە ەسكەرىلۋى ءتيىس.
مەملەكەت باسشىسى قازىرگى زامانعى سىن-قاتەرلەرگە ءتيىمدى جاۋاپ بەرە الاتىن جاڭا ۇلگىدەگى ارميا قالىپتاستىرۋ قاجەتتىگىن اتاپ ءوتتى. بۇل باعىتتا اسكەري ءتارتىپتى كۇشەيتۋ، قىزمەتشىلەرگە ءتيىستى جاعداي جاساۋ جانە قاۋىپسىزدىك دەڭگەيىن ارتتىرۋ نەگىزگى مىندەتتەردىڭ ءبىرى بولماق.
سونىمەن قاتار كەشەندى تەكسەرىستىڭ وبەكتيۆتى ءارى جان-جاقتى جۇرگىزىلۋى جانە ونىڭ قارۋلى كۇشتەردىڭ جاۋىنگەرلىك ازىرلىگىنە كەرى اسەر ەتپەۋى قاجەت ەكەنى ايتىلدى.
پرەزيدەنت قارۋلى كۇشتەر قاتارىندا كونستيتۋتسيادا بەكىتىلگەن «زاڭ مەن ءتارتىپ» قاعيداتى قاتاڭ ساقتالۋعا ءتيىس ەكەنىن اتاپ ءوتتى.
كوميسسيانىڭ جۇمىسى جالعاسىپ جاتىر.
ەسكە سالايىق، 24 قىركۇيەكتە ماڭعىستاۋ وبلىسىندا قازاقستان قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى كەزىندە 17 اسكەري قىزمەتشىنى تەڭىز اعىزىپ اكەتكەن. ولار كاسپي جاعالاۋىندا وقۋ-جاۋىنگەرلىك تاپسىرما ورىنداپ جاتقاندا اۋا رايى كۇرت ناشارلاپ، جەل كۇشەيگەن.
قورعانىس مينيسترلىگىنىڭ مالىمەتىنشە، 14 اسكەري قىزمەتشى قازا تاپقان، ۇشەۋى قۇتقارىلدى.
قايعىلى وقيعادان كەيىن 25 قىركۇيەك قازاقستاندا جالپىۇلتتىق ازا تۇتۋ كۇنى بولىپ جاريالانعان بولاتىن.
