فوتو جي-مەن جاسالعان
اقش پرەزيدەنتى دونالد ترامپ اسكەري قىزمەتشىنى اتۋ جازاسىنا سانكتسيا بەردى، دەپ حابارلايدى “ادىرنا”.
ترامپ تەحاستاعى فورت-حۋد اسكەري بازاسىندا 2009 جىلى 13 ادامدى ولتىرگەن بۇرىنعى اسكەري پسيحياتر نيدال ماليك حاسانعا شىعارىلعان ءولىم جازاسىن ورىنداۋعا سانكتسيا بەرگەن. ۇكىمدى اتۋ ارقىلى ورىنداۋ تۋرالى ۇسىنىستى اقش قورعانىس ءمينيسترى پيت حەگسەت ەنگىزگەن.
پەنتاگون وكىلى شون پارنەللدىڭ مالىمەتىنشە، اتۋ جازاسىنىڭ ناقتى ۋاقىتى مەن ورنى ازىرگە بەلگىلەنگەن جوق. ەگەر ۇكىم وسى تاسىلمەن ورىندالسا، بۇل اقش اسكەري قىزمەتشىسىنە قاتىستى 1945 جىلدان بەرى العاش رەت اتۋ جازاسىنىڭ قولدانىلۋى بولادى.
نيدال ماليك حاسان 2009 جىلى فورت-حۋد اسكەري بازاسىندا قارۋلى شابۋىل جاساپ، 13 اسكەري قىزمەتشىنى ءولتىرىپ، تاعى 32 ادامدى جارالاعان. شابۋىل اسكەري قىزمەتشىلەر اۋعانستانعا جىبەرىلەر الدىندا مەديتسينالىق تەكسەرۋدەن ءوتىپ جاتقان كەزدە بولعان. حاسان وقيعا ورنىندا پوليتسيا تاراپىنان جارالانىپ، كەيىن مۇگەدەكتەر ارباسىنا تاڭىلعان.
2013 جىلى اسكەري تريبۋنال حاساندى 45 باپ بويىنشا كىنالى دەپ تانىپ، ءولىم جازاسىنا كەستى. ول سوت بارىسىندا شابۋىلدى ءوزى جاساعانىن جوققا شىعارماعان. حاسان اسكەري قىزمەتشىلەردىڭ اۋعانستانداعى سوعىسقا اتتانۋىنا قارسىلىق بىلدىرگەنىن ايتقان.
اقش اسكەري جۇيەسىندە ءولىم جازاسىن ورىنداۋ ءۇشىن پرەزيدەنتتىڭ سانكتسياسى قاجەت. اسكەري قىزمەتشىگە قاتىستى سوڭعى ءولىم جازاسى 1961 جىلى دارعا اسۋ ارقىلى ورىندالعان. ال اقش-تا اسكەري سوتتالعان ادامدى اتۋ ارقىلى ءولىم جازاسىنا كەسۋدىڭ سوڭعى بەلگىلى جاعدايى 1945 جىلدىڭ قاراشاسىندا تىركەلگەن.
