اق ءۇي باسشىسى دونالد ترامپ فرانتسياداعى جاپپاي كوشى-قون جاعدايى باقىلاۋدان شىعىپ كەتكەنىن مالىمدەپ، يسلامنىڭ بۇل ەلدى «جاۋلاپ الۋعا» ۇمتىلىپ جاتقانىن ايتتى. بۇل تۋرالى امەريكالىق كوشباسشى ءوزىنىڭ Truth Social الەۋمەتتىك جەلىسىندەگى پاراقشاسىندا جازدى، دەپ حابارلايدى «ادىرنا» ءتىلشىسى.
«فرانتسيادا بولىپ جاتقان جاعداي – باقىلاۋدان شىققان جاپپاي كوشى-قوننىڭ سالدارى. ماسەلە مەكتەپتەردە ەمەس، يسلامنىڭ ءبىر كەزدەرى ۇلى مەملەكەت بولعان ەلدى جاۋلاپ الۋعا ۇمتىلۋىندا!» – دەپ جازدى ترامپ.
اقش پرەزيدەنتىنىڭ بۇل مالىمدەمەسى فرانتسيادا وقۋشىلار مەن ستۋدەنتتەردىڭ جاپپاي نارازىلىق شەرۋلەرى ءجۇرىپ جاتقان كەزەڭدە ايتىلدى. نارازىلىقتار قىركۇيەك ايىندا پاريج ماڭىنداعى اۋدانداردا باستالىپ، كەيىن بۇكىل ەلگە تاراعان بولاتىن.
5 قازاندا فرانتسيانىڭ ءبىلىم ءمينيسترى ەدۋار جەففرە شەرۋلەر باستالعالى بەرى 190 وقۋشى زارداپ شەككەنىن حابارلادى. ونىڭ ايتۋىنشا، وقۋشىلاردىڭ ءبىر بولىگى تارتىپسىزدىكتەر مەن پيروتەحنيكالىق قۇرالداردى قولدانۋ سالدارىنان جاراقات العان. وسى ۋاقىتقا دەيىن ەلدە اكتسيالارعا قاتىسقان جۇزدەگەن ادام ۇستالعان.
سول كۇنى فرانتسياداعى 24 ءبىلىم بەرۋ مەكەمەسىنىڭ نارازىلىقتار كەزىندە ورتەنگەنى نەمەسە تونالعانى بەلگىلى بولدى. قاۋىپسىزدىكتى قامتاماسىز ەتۋ مۇمكىن بولماعاندىقتان، 400-دەن 500-گە دەيىنگى ليتسەي وقۋ پروتسەسىن تولىق نەمەسە ءىشىنارا توقتاتۋ تۋرالى شەشىم قابىلداعان.
