الماتى قالالىق پوليتسيا دەپارتامەنتىنىڭ تەرگەۋ باسقارماسى 37 جاستاعى پوليتسەي اسلان السەروۆتىڭ ولىمىنە قاتىستى سوتقا دەيىنگى تەرگەپ-تەكسەرۋدى اياقتادى، دەپ حابارلايدى "ادىرنا".
پوليتسيا مالىمەتىنشە، قىلمىستىق ءىس ماتەريالدارى ءىستى سوتقا جولداۋ ماسەلەسىن قاراۋ ءۇشىن الماتى قالاسىنىڭ پروكۋراتۋراسىنا جىبەرىلدى.
اسلان السەروۆتىڭ ءمايىتى بيىل 23 ماۋسىمدا الماتى وبلىسىنداعى كوكپەك – كوكتال – كەگەن اۆتوجولىنىڭ 52-شاقىرىمىندا، كەگەن اسۋىنا جاقىن جەردەن تابىلعان. مارقۇمنىڭ دەنەسى ورتەنگەن كۇيدە بولعان. وقيعا ورنىن قاراۋ كەزىندە كريميناليستەر ونىڭ وڭ قولىنان ارقان قالدىقتارىن انىقتاعان.
كەيىن قىلمىسقا كۇدىكتى رەتىندە پوليتسەيدىڭ ايەلى مەن 14 جاستاعى ۇلى ۇستالعان. تەرگەۋ نۇسقاسىنا سايكەس، قىلمىس الماتىداعى پاتەردە جاسالىپ، كەيىن مارقۇمنىڭ دەنەسى قالا سىرتىنا شىعارىلىپ، ورتەلگەن.
اسلان السەروۆ پوليتسيادا اعا جەدەل ۋاكىل قىزمەتىن اتقارعان. ونىڭ جۇبايى دا قۇقىق قورعاۋ ورگاندارىندا جۇمىس ىستەگەن. ەرلى-زايىپتى 15 جىل بىرگە تۇرىپ، جەتى بالا تاربيەلەگەن.
قىلمىستىق ءىس بويىنشا سوڭعى شەشىمدى پروكۋراتۋرا قابىلدايدى.
